തിരുവനന്തപുരം: നിയമസഭാ തെരഞ്ഞെടുപ്പിൽ  യുവാക്കളുടെ പങ്കാളിത്തം ഉറപ്പാക്കാൻ വേറിട്ട ബോധവൽക്കരണവുമായി മുഖ്യ തെരഞ്ഞെടുപ്പ് ഓഫിസർ രത്തൻ യു. ഖേൽക്കറും കലക്ടറുമടങ്ങുന്ന സംഘം. റാപ്പ് ഗാനത്തിനൊപ്പം ചുവടുവച്ച മുഖ്യ തെര. ഓഫിസറുടെ വിഡിയോ ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. മുഖ്യ തെരഞ്ഞെടുപ്പ് കമ്മിഷണർ ജ്ഞാനേഷ് കുമാർ കൊച്ചിയിൽ പുറത്തിറക്കിയ ഈ വിഡിയോക്ക് ഒരു മിനിറ്റും 33 സെക്കൻഡുമാണ് ദൈർഘ്യം. തിരുവനന്തപുരം കലക്ടര്‍ അനുകുമാരി, അസിസ്റ്റന്റ് കലക്ടര്‍ ഡോ. ശിവശക്തിവേല്‍ എന്നിവരുള്‍പ്പെടെ നിയമസഭാ തെരഞ്ഞെടുപ്പ് നടത്തിപ്പില്‍ ഉള്‍പ്പെട്ട ഉന്നത ഉദ്യോഗസ്ഥരെല്ലാം ഖേല്‍ക്കറിനൊപ്പം പ്രചാരണ വിഡിയോയിലുണ്ട്.  'ഇത് നിന്റെ വോട്ടാണ്, നമ്മുടെ നാടിന് വേണമീ വോട്ട്' എന്ന് തുടങ്ങുന്ന ആവേശകരമായ റാപ്പ് ഗാനത്തിനൊപ്പം നൃത്തച്ചുവടുകളുമായാണ്  ഉദ്യോഗസ്ഥർ രംഗത്തെത്തിയിരിക്കുന്നത്. തെരഞ്ഞെടുപ്പ് വകുപ്പ് അണ്ടര്‍ സെക്രട്ടറി എസ്.എസ് സരിന്‍, ബി.എല്‍.ഒ സത്യഭാമ, അനഘ സജികുമാര്‍, മാനസ ആര്‍ബി, ദേവിക അനില്‍, എൽ. ദീപ, എം.എസ് അനീഷ്, അഭിജിത്ത്, അശ്വിന്‍ എന്നിവരും നൃത്തസംഘത്തിലുണ്ട്.

ALSO READ: 'ചോദ്യം ചോദിക്കുന്നവരെ അടിച്ചമർത്തുന്നു'; മോദിയും പിണറായിയും ഒരേ നാണയത്തിന്റെ ഇരുവശങ്ങളെന്ന് പ്രിയങ്ക

വോട്ടിങ്ങിന്റെ പ്രാധാന്യം ലളിതമായും ആകർഷകമായും ജനങ്ങളിലെത്തിക്കാൻ ഇത്തരം നവീനമായ പ്രചാരണ പരിപാടികൾ സഹായിക്കുമെന്നാണ് തെരഞ്ഞെടുപ്പ് കമ്മിഷന്റെ വിലയിരുത്തൽ.