ന്യൂഡല്‍ഹി: തമിഴ്‌നാട് നിയമസഭാ തെരഞ്ഞെടുപ്പ് പ്രചാരണത്തിനെത്തിയ പ്രധാനമന്ത്രി നരേന്ദ്രമോദിയുടെ ചര്‍മ്മത്തിലെ നിറമാറ്റത്തില്‍ വിവാദം. ഡല്‍ഹിയില്‍ വെളുത്ത നിറത്തോടു കൂടിയ മോദി തമിഴ്‌നാട്ടിലെ പരിപാടിക്കെത്തിയപ്പോള്‍ ചര്‍മ്മത്തിന് കൂടുതല്‍ കറുപ്പ് അല്ലെങ്കില്‍ തവിട്ട് നിറം തോന്നിച്ചുവെന്നും പ്രചാരണത്തിന്റെ ഭാഗമായി മോദി അറിഞ്ഞു ചെയ്ത മേക്കപ്പാണെന്നുമാണ് ഉയരുന്ന വിമര്‍ശനം. തമിഴ്‌നാട്ടിലെ പ്രചാരണത്തിനായി ഇരുണ്ട നിറം വരുത്തിയതാണെങ്കില്‍ അത് റേസിസമാണെന്നാണ് വിമര്‍ശനമുയരുന്നത്. 

ആദ്യഘട്ട തെരഞ്ഞെടുപ്പിന് മുന്നോടിയായി തമിഴ്നാട്ടില്‍ മോദി പങ്കെടുത്ത റാലിയുടെ വീഡിയോകളും ചിത്രങ്ങളും സമൂഹ മാധ്യമങ്ങളില്‍ വ്യാപകമായി പ്രചരിച്ചിരുന്നു. ഇതിനു പിന്നാലെയാണ് പ്രധാനമന്ത്രിയുടെ ചര്‍മനിറം പതിവിലും ഇരുണ്ടിരിക്കുന്നു എന്ന് വിമര്‍ശനമുയര്‍ന്നത്. ഇതിനെ 'തമിഴ്‌നാട് മേക്കോവര്‍' എന്നാണ് ചിലര്‍ വിളിച്ചിരിക്കുന്നത്.

വെയിലേറ്റതുകൊണ്ട് സംഭവിച്ചതാണെന്ന് മോദി അനുകൂലികള്‍ പറയുന്നുണ്ടെങ്കിലും അതല്ല ഗ്രാമീണ വോട്ടര്‍മാരെ ആകര്‍ഷിക്കാനായി മനപൂര്‍വം ചെയ്തതാണെന്നാണ് സോഷ്യല്‍മീഡിയയില്‍ മറ്റുള്ളവരുടെ അഭിപ്രായം. '50 Shades of modi ji' എന്ന പേരിലാണ് സമൂഹമാധ്യമങ്ങളില്‍ ഇത് സംബന്ധിച്ച ചര്‍ച്ചകള്‍ നടക്കുന്നത്. 

'മേക്കപ്പിലൂടെ നിറം മാറ്റുന്നത് ദ്രാവിഡ ജനതയെ അപമാനിക്കലാണെന്നും', 'ദക്ഷിണേന്ത്യക്കാരുടെ ഇരുണ്ട ചര്‍മത്തെ പരിഹസിക്കുകയാണെന്നും' വിമര്‍ശനമുയര്‍ന്നു. 

അതേസമയം, കഠിനമായ സൂര്യപ്രകാശം, ക്യാമറ എക്‌സ്‌പോഷര്‍, ദൃശ്യങ്ങള്‍ പകര്‍ത്തിയ ആംഗിളുകള്‍, എഡിറ്റിങ് ഫില്‍റ്ററുകള്‍ എന്നിവ കാരണം നിറത്തില്‍ വ്യത്യാസം തോന്നുന്നതാണെന്നാണ് മറ്റുചിലര്‍ വാദിക്കുന്നത്.

ഡല്‍ഹിയില്‍ നിന്ന് തമിഴ്‌നാട്ടിലെത്തിയപ്പോള്‍ ചര്‍മ്മത്തിലെ കളറില്‍ മാത്രമല്ല, പ്രധാനമന്ത്രിയുടെ വസ്ത്രത്തിലും മാറ്റങ്ങള്‍ വരുത്തിയിട്ടുണ്ട്. മോദിയുടെ ഈ രണ്ട് ചിത്രങ്ങളും ആളുകള്‍ പങ്കുവെക്കുന്നുണ്ട്. 

'സ്ഥലങ്ങള്‍ അനുസരിച്ച് വേഷം മാത്രമല്ല ചര്‍മ്മത്തിന്റെ നിറവും മാറി, മോദി മികച്ച നടനാണെന്ന് വീണ്ടും തെളിയിച്ചു, സൗത്തിലെത്തുമ്പോള്‍ മോദി കറുക്കും, നോര്‍ത്തിലെത്തിയാല്‍ വെളുക്കും, മോദിയുടെ മാര്‍ക്കറ്റിങ് ടീം കൊള്ളാം.. എന്നിങ്ങനെ പോകുന്നു കമന്റുകള്‍. എന്തായാലും കമന്റുകളായും മീമുകളായും വിഡിയോകളായും ഈ നിറംമാറ്റം സോഷ്യല്‍മീഡിയില്‍ തീപോലെ പടരുകയാണ്. 

A controversy has emerged over Prime Minister Narendra Modi’s appearance during different public events, with critics pointing out perceived changes in skin tone and attire between his Delhi and Tamil Nadu appearances. The issue has sparked political debate and discussions on public image and presentation.