നിലമ്പൂർ: സംസ്ഥാന സർക്കാർ മെഡിസെപ് ഇൻഷുറൻസ് പദ്ധതിക്കായി നിയോഗിച്ച നോഡൽ ഓഫിസർമാരുടെ ഫോൺ വിവരങ്ങൾ പകുതിയിലേറെ മറച്ചത് ഗുണഭോക്താക്കൾക്ക് തിരിച്ചടി. സർക്കാർ ജീവനക്കാർക്കും, പെൻഷൻകാർക്കും അവരുടെ ആശ്രിതർക്കുമായുള്ള ഇൻഷുറൻസ് പദ്ധതിയുടെ ഏകോപനത്തിനായി നിയോഗിക്കപ്പെട്ട നോഡൽ ഓഫിസർമാരുടെ ഫോൺ വിവരങ്ങൾ പ്രസിദ്ധീകരിച്ചതിലെ അവ്യക്തതയാണ് ഗുണഭോക്താക്കളെ വലയ്ക്കുന്നത്. പദ്ധതിയുമായി ബന്ധപ്പെട്ട പരാതികൾ പരിഹരിക്കാനും ക്ലെയിം തടസങ്ങൾ നീക്കാനുമായി വിവിധ വകുപ്പുകളിലായി ഇരുന്നൂറിലധികം നോഡൽ ഓഫിസർമാരെയാണ് ചുമതലപ്പെടുത്തിയിരിക്കുന്നത്. 

എന്നാൽ, ഔദ്യോഗികമായി ലഭ്യമാക്കിയിട്ടുള്ള പട്ടികയിൽ ഈ ഉദ്യോഗസ്ഥരുടെ മൊബൈൽ നമ്പറുകൾ അപൂർണമായാണ് രേഖപ്പെടുത്തിയിരിക്കുന്നത്. ജില്ലാ കോടതികളിലെ സീനിയർ ക്ലർക്കുമാർ മുതൽ സെക്രട്ടേറിയറ്റിലെ അഡീഷനൽ സെക്രട്ടറിമാർ വരെയുള്ളവരുടെ വിവരങ്ങൾ പട്ടികയിലുണ്ടെങ്കിലും സമ്പർക്ക നമ്പറുകൾ ഉപയോഗശൂന്യമായ നിലയിലാണ്. വിവിധ ജില്ലകളിലെ പഞ്ചായത്ത് ഡെപ്യൂട്ടി ഡയരക്ടർമാർ, ആരോഗ്യ വകുപ്പിലെ ഉദ്യോഗസ്ഥർ എന്നിവരുടെയെല്ലാം നമ്പറുകളുടെ ആദ്യ ആറക്കങ്ങൾ മാത്രം നൽകി ബാക്കി അപൂർണമായാണ് നൽകിയിരിക്കുന്നത്.