തിരുവനന്തപുരം: ചിറയന്‍കീഴില്‍ എട്ടുവയസുകാരന്‍ പാമ്പുകടിയേറ്റ് മരിച്ച സംഭവത്തില്‍ റിപ്പോര്‍ട്ട് തേടി ഡി.എം.ഒ. മെഡിക്കല്‍ കോളജ് സൂപ്രണ്ടിനോട് അടിയന്തര റിപ്പോര്‍ട്ട് നല്‍കാനാണ് നിര്‍ദ്ദേശം നല്‍കിയത്. കുട്ടിയെ ആദ്യം എത്തിച്ച  ചിറയന്‍കീഴ് താലൂക്ക് ആശുപത്രിയില്‍ നിന്ന് മതിയായ ചികിത്സ ലഭിച്ചിരുന്നില്ലെന്ന് കുടുംബം ആരോപിച്ചതിന്റെ പശ്ചാത്തലത്തിലാണ് ഇത്.

തിരുവനന്തപുരം ചിറയിന്‍കീഴ് അഴൂരില്‍ എട്ടു വയസ്സുകാരനാണ് കടിയേറ്റത്. മൂലയില്‍ വീട്ടില്‍ ദിലീപ് അനു ദമ്പതികളുടെ മകന്‍ ദിക്ഷലിന് ഉറങ്ങുന്നതിനിടെയാണ് പാമ്പുകടിയേറ്റതെന്നാണ് വിവരം. എന്നാല്‍ വെളുപ്പിന് നാല് മണിയോടെയാണ് കുട്ടിയെ പാമ്പ് കടിച്ച വിവരം വീട്ടുകാര്‍ക്ക് മനസ്സിലായത്.

ഉടന്‍ ചിറയിന്‍കീഴ് ആശുപത്രിയില്‍ എത്തിച്ചു. കുട്ടി ബുദ്ധിമുട്ടുകള്‍ പറഞ്ഞപ്പോഴും നിസാരമായാണ് അതിനെ ഡോക്ടര്‍മാര്‍ കണ്ടതെന്നാണ് കുട്ടിയുടെ പിതാവ് പരാതി പറഞ്ഞത്. ഇവിടെ നിന്ന്   പ്രാഥമിക ചികിത്സ നല്‍കി മെഡിക്കല്‍ കോളേജ് ആശുപത്രിയിലേക്ക് അയക്കുകയും ചെയ്തു. എന്നാല്‍ ജീവന്‍ രക്ഷിക്കാനായില്ല. കുട്ടിയുടെ വീട്ടില്‍ നിന്ന് ഒരു മൂര്‍ഖന്‍ പാമ്പിനെ പിടികൂടിയിട്ടുണ്ട്. കുട്ടിയുടെ മൃതദേഹം മെഡിക്കല്‍ കോളജ് ആശുപത്രിയില്‍ സൂക്ഷിച്ചിരിക്കുകയാണ്.

സംസ്ഥാനത്ത് പാമ്പ് കടിച്ചതുമായി ബന്ധപ്പെട്ട് നിരവധി കേസുകളാണ് അടുത്തിടെ റിപ്പോര്‍ട്ട് ചെയ്യപ്പെട്ടിട്ടുള്ളത്.  ഇന്നലെ തൃശൂര്‍ വാണിയംപാറയില്‍ രണ്ടര വയസ്സുകാരന് പാമ്പ് കടിയേറ്റിരുന്നു. കൊമ്പഴ മാളിയേക്കല്‍ വീട്ടില്‍ ശ്യാം പീറ്ററിന്റെ മകന്‍ ആദമിനാണ് കടിയേറ്റത്. രാവിലെ വീടിനുള്ളിലെ ശുചിമുറിയില്‍ വെച്ചാണ് കുട്ടിയെ പാമ്പ് കടിച്ചതെന്നാണ് റിപ്പോര്‍ട്ട്. അതീവ വിഷമുള്ള ശംഖുവരയന്‍ പാമ്പാണ് കുട്ടിയെ കടിച്ചതെന്നാണ് സൂചന. പിന്നീട് കുട്ടിയുടെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു.

മുന്‍പത്തെ ദിവസം തൃശൂരില്‍ തന്നെ എട്ടു വയസ്സുകാരന്‍ പാമ്പുകടിയേറ്റ് മരണപ്പെട്ടിരുന്നു. കൊടകര മറ്റത്തൂരില്‍ കടമ്പോട് കാവുങ്ങല്‍ സില്‍ജോയുടെ മകന്‍ അല്‍ജോ ആണ് മരിച്ചത്. അല്‍ജോയുടെ സഹോദരന്‍ 10 വയസ്സുള്ള അലോജിനും കടിയേറ്റരുന്നു. ഉറങ്ങിക്കിടക്കവേയാണ് ഇവര്‍ക്ക് പാമ്പു കടിയേറ്റത്. 

The Thiruvananthapuram District Medical Officer (DMO) has called for a detailed report following the tragic death of an eight-year-old boy due to a snakebite in Chirayinkeezhu.