തെഹ്റാന്‍: ഹോര്‍മുസില്‍ ഇറാന്‍ സൈന്യം കപ്പലുകള്‍ പിടിച്ചെടുക്കുന്നതിന്റെ ദൃശ്യം പുറത്തു വിട്ട് ഐ.ആര്‍.ജി.സി. മുന്നറിയിപ്പ് അവഗണിച്ച് ഹോര്‍മുസ് കടലിടുക്കിലൂടെ സഞ്ചരിച്ച രണ്ട് വാണിജ്യ കപ്പലുകളാണ് സൈന്യം പിടിച്ചെടുക്കുന്നത്. ബോട്ടുകളില്‍ ഇരച്ചെത്തുന്ന സൈനികര്‍ കപ്പലില്‍ കയറി നിയന്ത്രണമേറ്റെടുക്കുന്നത് ദൃശ്യങ്ങളില്‍ വ്യക്തമാണ്. ഇറാന്‍ ടി.വിയാണ് ദൃശ്യങ്ങള്‍ പുറത്തുവിട്ടത്. ഇറാന്റെ കപ്പല്‍ പിടികൂടുന്ന ദൃശ്യങ്ങള്‍ നേരത്തെ യു.എസ് പുറത്തുവിട്ടിരുന്നു.

ഇറാനുമായുള്ള വെടിനിര്‍ത്തല്‍ നീട്ടിയതായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ച് മണിക്കൂറുകള്‍ക്ക് ശേഷമാണ് ഹോര്‍മുസ് കടലിടുക്കില്‍ രണ്ട് വിദേശ വാണിജ്യ കപ്പലുകള്‍ ഇറാന്‍ പിടിച്ചെടുത്തത്. എം.എസ്.സി ഫ്രാന്‍സെസ്‌ക, എം.എസ്.സി എപാമിനോഡെസ് എന്നീ കപ്പലുകളാണ് പിടിച്ചെടുത്തത്. 

ALSO READ: വെടിനിര്‍ത്തല്‍ ലംഘിച്ച് വീണ്ടും ഇസ്‌റാഈല്‍; ലബനാനില്‍ മാധ്യമപ്രവര്‍ത്തക ഉള്‍പെടെ അഞ്ചുപേരെ കൊലപ്പെടുത്തി; രക്ഷാപ്രവര്‍ത്തനത്തിന് അനുവദിക്കാതെ ആക്രമണം തുടര്‍ന്നു

യു.എസിന്റെ നിയമവിരുദ്ധ നടപടികള്‍ക്കുള്ള മറുപടിയായാണ് ഇറാന്റെ പ്രവൃത്തിയെന്ന് ബന്ധപ്പെട്ടവര്‍ വ്യക്തമാക്കി. നാവിഗേഷനില്‍ കൃത്രിമം കാണിക്കുകയോ ഇറാനിയന്‍ നിയമങ്ങള്‍ ലംഘിക്കുകയോ ചെയ്താല്‍ കടുത്ത പ്രത്യാഘാതം നേരിടേണ്ടിവരുമെന്നും ഐ.ആര്‍.ജി.സി മുന്നറിയിപ്പ് നല്‍കിയിട്ടുണ്ട്.

അതിനിടെ, അമേരിക്ക ഏര്‍പ്പെടുത്തിയ കടുത്ത നാവിക ഉപരോധത്തെ വെല്ലുവിളിച്ച് 34 ഇറാനിയന്‍ കപ്പലുകള്‍ ഹോര്‍മുസ് കടലിടുക്ക് കടന്നതായി റിപ്പോര്‍ട്ടുണ്ട്. ചരക്ക് കപ്പല്‍ ഡാറ്റാ ട്രാക്കിങ് ഏജന്‍സിയായ വോര്‍ടെക്‌സയെ ഉദ്ധരിച്ചാണ് ഫിനാന്‍ഷ്യല്‍ ടൈംസിന്റെ റിപ്പോര്‍ട്ട്.

iran’s revolutionary guard seizes two foreign commercial ships in the hormuz strait shortly after ceasefire extension announcement, escalating regional tensions