ന്യൂഡല്‍ഹി: മലിനീകരണ നിയന്ത്രണ സര്‍ട്ടിഫിക്കറ്റ് (പിയുസി) ഇല്ലെങ്കില്‍ വാഹനങ്ങള്‍ക്ക് ഇന്ധനം ലഭിക്കില്ലെന്ന് ഡല്‍ഹി സര്‍ക്കാര്‍. വായു മലിനീകരണത്തിന്റെ തോത് കുറക്കുന്നതിനുള്ള നടപടിയുടെ ഭാഗമായാണ് പുതിയ തീരുമാനമെന്ന് ഡല്‍ഹി മുഖ്യമന്ത്രി രേഖ ഗുപ്ത പറഞ്ഞു. 

' വായു മലിനീകരണം നേരിടുന്നതിന് ഉറച്ചതും ഫലപ്രദവുമായ ഇടപെടലുകള്‍ ആവശ്യമാണ്. ഈ തീരുമാനം അതിനുവേണ്ടിയുള്ള ഒരു നിര്‍ണായക ചുവടുവെപ്പാണ്. ശുദ്ധവും ആരോഗ്യകരവുമായ അന്തരീക്ഷം ഉറപ്പാക്കുന്നതിനുള്ള പ്രതിബദ്ധത സര്‍ക്കാരിനുണ്ട് രേഖ ഗുപ്ത പറഞ്ഞു. 

ALSO READ: ആവർത്തിക്കുന്ന വെടിക്കെട്ട് ദുരന്തം; എങ്ങുമെത്താത്ത അന്വേഷണങ്ങളും ശുപാർശകളും 

1989ലെ കേന്ദ്ര മോട്ടോര്‍ വാഹന നിയമപ്രകാരമുള്ള വ്യവസ്ഥകളുമായി ബന്ധപ്പെടുത്തിയാണ് ഈ നീക്കം. രജിസ്‌ട്രേഷന്‍ കഴിഞ്ഞ് ഒരു വര്‍ഷത്തിനുശേഷം എല്ലാ വാഹനങ്ങള്‍ക്കും സാധുവായ പിയുസി സര്‍ട്ടിഫിക്കറ്റ് ഉണ്ടായിക്കണമെന്ന് നിയമം നിഷ്‌കര്‍ഷിക്കുന്നുണ്ട്. മലിനീകരണ തോത് ഉയരുന്നതിന് കാരണമാകുന്ന തരത്തില്‍ സര്‍ട്ടിഫിക്കേഷന്‍ ഇല്ലാതെ ഓടുന്ന വാഹനങ്ങളുടെ എണ്ണം ഇപ്പോഴും ഡല്‍ഹിയില്‍ കൂടുന്നതായാണ് കണക്കുകള്‍. മലിനീകരണമുണ്ടാകുന്ന വാഹനങ്ങള്‍ക്കെതിരെ പിഴയും പിടിച്ചെടുക്കലും ഉള്‍പ്പെടെ കര്‍ശനമായ നടപടികള്‍ സ്വീകരിക്കണമെന്ന് പരിഷ്‌കരിച്ച് ഗ്രേഡഡ് റെസ്‌പോണ്‍സ് ആക്ഷന്‍ പ്ലാനിലുണ്ട്. പുതിയ ഉത്തരവ് പ്രകാരം സാധുവായ പിയുസി സര്‍ട്ടിഫിക്കറ്റുകള്‍ ഉള്ള വാഹനങ്ങള്‍ക്ക് മാത്രമേ ഇന്ധനം വിതരണം ചെയ്യൂ. എല്ലാ ഇന്ധന സ്റ്റേഷനുകളും കര്‍ശനമായ ഈ ഉത്തരവ് പാലിക്കണമെന്ന് സര്‍ക്കാര്‍ നിര്‍ദേശം നല്‍കിയിട്ടുണ്ട്. 

വീഴ്ച്ച വരുത്തിയാല്‍ കര്‍ശന നടപടിയെടുക്കുമെന്ന് സര്‍ക്കാര്‍ മുന്നറിയിപ്പ് നല്‍കി.

Delhi government has announced that vehicles without a Pollution Under Control (PUC) certificate will not be provided fuel.