സി.പി.എമ്മിനെ ഞെട്ടിച്ച് പാര്‍ട്ടി കോട്ടകളായ പയ്യന്നൂരിലും തളിപ്പറമ്പിലും അമ്പലപ്പുഴയിലും വിമതര്‍ക്ക് മുന്നേറ്റം. പയ്യന്നൂരില്‍ 11 റൗണ്ട് എണ്ണിയപ്പോള്‍ വി. കുഞ്ഞികൃഷ്ണന്‍ 3805 വോട്ടിനാണ് ലീഡ് ചെയ്യുന്നത്. രക്തസാക്ഷി ഫണ്ട് തട്ടിപ്പ് വിവാദത്തില്‍ സി.പി.എമ്മില്‍ നിന്ന് പുറത്തുവന്ന് എല്‍.ഡി.എഫ് സ്ഥാനാര്‍ഥി ടി.ഐ മധുസൂദനനെതിരെയാണ് വി. കുഞ്ഞികൃഷ്ണന്‍ മത്സരിക്കുന്നത്. ജയിക്കാനല്ല മത്സരിക്കുന്നതെന്ന് പ്രഖ്യാപിച്ച് മത്സരിക്കാനിറങ്ങിയ കുഞ്ഞിക്കൃഷ്ണന് പക്ഷേ ജനങ്ങള്‍ വന്‍ പിന്തുണയാണ് നല്‍കിയത്. 

തളിപ്പറമ്പിലും സ്ഥിതി വ്യത്യസ്തമല്ല. സി.പി.എം വിട്ട് യു.ഡി.എഫ് പിന്തുണയില്‍ മത്സരിച്ച ടി.കെ. ഗോവിന്ദന് 7206 വോട്ടിന്റെ ലീഡുണ്ട്. അഞ്ച് റൗണ്ട് വോട്ടെണ്ണലാണ് തളിപ്പറമ്പില്‍ പൂര്‍ത്തിയായത്.

തളിപ്പറമ്പില്‍ സി.പി.എം സംസ്ഥാന സെക്രട്ടറി എം.വി ഗോവിന്ദന്റെ ഭാര്യ പി.കെ ശ്യാമളയെ സ്ഥാനാര്‍ത്ഥിയാക്കിയതില്‍ പ്രതിഷേധിച്ചാണ് സി.പി.എം ജില്ലാ സെക്രട്ടേറിയറ്റ് അംഗമായിരുന്ന ടി.കെ ഗോവിന്ദന്‍ വിമതനായി മത്സരിച്ചത്. ഗോവിന്ദനെ യു.ഡി.എഫ് പിന്തുണയ്ക്കുകയായിരുന്നു. 

അമ്പലപ്പുഴയില്‍ ജി. സുധാകരന്റെ ലീഡ് 7774 വോട്ടാണ്. സി.പി.എമ്മിന്റെ എച്ച് സലാമിനെയാണ്  ജി സുധാകരന്‍ പിന്നിലാക്കിയത്.