കൊല്‍ക്കത്ത: പശ്ചിമ ബംഗാള്‍ മുഖ്യമന്ത്രിയായി സുവേന്ദു അധികാരി അധികാരമേറ്റതിന് പിന്നാലെ സംസ്ഥാനത്ത് കര്‍ശന നിയന്ത്രണങ്ങള്‍ നടപ്പിലാക്കി ബിജെപി സര്‍ക്കാര്‍. ആരാധനാലയങ്ങള്‍ക്ക് പുറത്ത് പൊതുനിരത്തുകളോ തെരുവുകളോ തടസ്സപ്പെടുത്തിയുള്ള നമസ്‌കാരങ്ങള്‍ ഇനി അനുവദിക്കില്ലെന്നും സര്‍ക്കാര്‍ വ്യക്തമാക്കി. കൊല്‍ക്കത്തയിലെ പ്രസിദ്ധമായ റെഡ് റോഡിലടക്കം വര്‍ഷങ്ങളായി നടന്നു വന്നിരുന്ന ഈദ് നമസ്‌കാരങ്ങള്‍ക്കും ഇതോടെ വിലക്ക് വീഴും.

മുഖ്യമന്ത്രിയുടെ അധ്യക്ഷതയില്‍ ചേര്‍ന്ന കാബിനറ്റ് യോഗത്തിലാണ് നിര്‍ണായക തീരുമാനങ്ങള്‍ കൈക്കൊണ്ടതെന്ന് ബിജെപി എംഎല്‍എ അര്‍ജുന്‍ സിങ് അറിയിച്ചു. 'പ്രാര്‍ത്ഥനകള്‍ ആരാധനാലയങ്ങള്‍ക്കുള്ളില്‍ തന്നെ നടക്കണം, പൊതുജനങ്ങള്‍ക്ക് ബുദ്ധിമുട്ടുണ്ടാക്കുന്ന രീതിയില്‍ റോഡുകള്‍ കൈയേറാന്‍ അനുവദിക്കില്ല' എന്ന് അദ്ദേഹം വ്യക്തമാക്കി.

കല്ലേറ് ഉള്‍പ്പെടെയുള്ള അക്രമ സംഭവങ്ങളില്‍ ഏര്‍പ്പെടുന്നവര്‍ക്കെതിരെ കടുത്ത നിയമനടപടികള്‍ സ്വീകരിക്കാനും പൊലിസ് സേനയ്ക്ക് സര്‍ക്കാര്‍ നിര്‍ദേശം നല്‍കിയിട്ടുണ്ട്. പ്രതിരോധ മന്ത്രാലയത്തിന് കീഴിലുള്ള റെഡ് റോഡില്‍ നമസ്‌കാരത്തിന് അനുമതി നല്‍കുന്നത് സംബന്ധിച്ച് മുന്‍പും തര്‍ക്കങ്ങള്‍ നിലനിന്നിരുന്നു.

എന്നാല്‍ പള്ളികളിലെ സൗകര്യക്കുറവ് മൂലം റോഡിനെ ആശ്രയിക്കുന്ന സാധാരണ വിശ്വാസികളെ ഈ തീരുമാനം ബാധിക്കുമെന്ന ആശങ്കയും ഉയരുന്നുണ്ട്. സര്‍ക്കാരിന്റെ പുതിയ നീക്കം ബംഗാള്‍ രാഷ്ട്രീയത്തില്‍ വലിയ ചര്‍ച്ചകള്‍ക്കാണ് വഴിതുറന്നിരിക്കുന്നത്.

 Following Suvendu Adhikari's takeover as Chief Minister, the West Bengal government has banned religious prayers on public roads and directed strict legal action against those involved in stone-pelting and illegal activities.