ശ്രീകണ്ഠപുരം: ഒരു വര്‍ഷം മുമ്പ് ടൂറിസം വകുപ്പിന്റെ ഫണ്ടുപയോഗിച്ച് ശ്രീകണ്ഠപുരം ബസ്സ്റ്റാന്‍ഡ് പരിസരത്ത് നിര്‍മിച്ച അത്യാധുനിക വഴിയോര വിശ്രമകേന്ദ്രം നഗരസഭാ അധികൃതര്‍ അടപ്പിച്ചു. വിശ്രമകേന്ദ്രത്തില്‍ അനുമതിയില്ലാതെ കരാറുകാരന്‍ ഭക്ഷണശാല ആരംഭിച്ചതാണ് നടപടിക്കു കാരണം. കഴിഞ്ഞ യു.ഡി.എഫ് ഭരണത്തില്‍ 40 ലക്ഷം ചെലവഴിച്ചാണ് ടൂറിസം വകുപ്പിന്റെ സഹകരണത്തോടെ ടേക് എ ബ്രേക് എന്ന പേരില്‍ വിശ്രമകേന്ദ്രം ആരംഭിച്ചത്. സ്ത്രീകള്‍ക്കും കുട്ടികള്‍ക്കുമായി പ്രത്യേക ശൗചാലയവും ചെറിയ കഫ്റ്റീരിയയും എ.ടി.എം കൗണ്ടറും നിര്‍മിക്കാനാണ് തീരുമാനിച്ചത്. എന്നാല്‍ കരാറെടുത്തയാള്‍ ഇതിന്റെ പ്രവര്‍ത്തനം സ്വന്തം നിലയ്ക്കു നടത്തുകയായിരുന്നു. നഗരസഭയുടെയും ടൂറിസം വകുപ്പിന്റെയും അനുമതി വാങ്ങാതെ മുന്‍ഭാഗം ഷീറ്റു കെട്ടുകയും പിന്നീട് കഫ്റ്റിരിയ എന്ന പേരില്‍ ഹോട്ടല്‍ ആരംഭിക്കുകയും ചെയ്യുകയായിരുന്നു. വിവരമറിഞ്ഞ് ശ്രീകണ്ഠപുരം നഗരസഭാ അധികൃതര്‍ സ്ഥലത്തെത്തി വിശ്രമകേന്ദ്രം അടപ്പിക്കുകയായിരുന്നു. ജില്ലാ കലക്ടറുമായി സംസാരിച്ച് പുതിയ കരാറുകാരെ ഏല്‍പിക്കാനാണ് നഗരസഭയുടെ തീരുമാനം.