കല്‍പ്പറ്റ: വയനാട് കുടുംബശ്രീ ജില്ലാ മിഷന്‍ ഫണ്ടുകളില്‍ ക്രമക്കേട് നടത്തിയ സിപിഎം നേതാവ് ഉള്‍പ്പെടെ മൂന്ന് ജീവനക്കാരെ പിരിച്ചുവിട്ടു. ആദിവാസി വികസന പ്രവര്‍ത്തനങ്ങളുമായി ബന്ധപ്പെട്ട ഫണ്ടുകളില്‍ ഗുരുതര ക്രമക്കേട് നടത്തിയെന്നാണ് കണ്ടെത്തല്‍. 

കുടുംബശ്രീ ജില്ലാ പ്രോഗ്രാം മാനേജറും, സിപിഎം കല്‍പ്പറ്റ സിവില്‍ സ്റ്റേഷന്‍ ബ്രാഞ്ച് സെക്രട്ടറിയുമായ ജയേഷ് വി, വിഡികെ കോര്‍ഡിനേറ്റര്‍ ഹരീഷ്, സ്‌പെഷ്യല്‍ പ്രൊജക്ട് കോര്‍ഡിനേറ്റര്‍ സായികൃഷ്ണന്‍ എന്നിവരെയാണ് സര്‍വീസില്‍ നിന്ന് പിരിച്ചുവിട്ടത്. മൂവരും കുടുംബശ്രീയുടെ ആദിവാസി മേഖലയിലെ സ്‌പെഷ്യല്‍ പ്രോജക്ട് പ്രവര്‍ത്തനങ്ങളുമായി ബന്ധപ്പെട്ട ഉന്നത ഉദ്യോഗസ്ഥരാണ്.

വനവിഭവങ്ങളുടെ വില്‍പന നടത്തുന്നതുമായി ബന്ധപ്പെട്ട പ്രവര്‍ത്തനങ്ങളിലാണ് ക്രമക്കേട് നടന്നത്. പ്രാഥമിക അന്വേഷണത്തില്‍ പ്രതികള്‍ കുറ്റം ചെയ്തതായി തെളിഞ്ഞു. ഇതിന്റെ അടിസ്ഥാനത്തിലാണ് നടപടി.