തിരൂരങ്ങാടി:  സെപ്റ്റംബര്‍ 20 മുതല്‍ ബ്രൂണെയിലെ സുല്‍ത്താന്‍ ശരീഫ് അലി ഇസ്‌ലാമിക്  സര്‍വകലാശാലയില്‍ നടക്കുന്ന രാജ്യാന്തര ഇസ്‌ലാമിക് കോണ്‍ഫറന്‍സില്‍ ദാറുല്‍ഹുദാ ഇസ്‌ലാമിക്  യൂനിവേഴ്‌സിറ്റി വൈസ് ചാന്‍സലറും സമസ്ത കേരള ജംഇയ്യത്തുല്‍ ഉലമാ കേന്ദ്രമുശാവറ അംഗവുമായ  ഡോ. ബഹാഉദ്ദീന്‍ മുഹമ്മദ് നദ്‌വി പ്രബന്ധമവതരിപ്പിക്കും.
മലായ് രാജ്യങ്ങളിലെ ഇസ്‌ലാമിക  ചലനങ്ങളെ ആസ്പദമാക്കി നടത്തുന്ന ആറാമത് രാജ്യാന്തര കോണ്‍ഫറന്‍സില്‍ പുതിയ കാലത്തെ ഇസ്‌ലാമിക  വിദ്യാഭ്യാസ സംവിധാനങ്ങളെയും അധ്യാപന രീതികളെയും ഗവേഷണപഠനങ്ങളെയും സമഗ്രമായി  ചര്‍ച്ചചെയ്യുന്ന നൂറിലധികം പ്രബന്ധങ്ങള്‍ അവതരിപ്പിക്കുന്നുണ്ട്. ബ്രൂണെ, മലേഷ്യ, തായ്‌ലാന്റ്, ഇന്തോനേഷ്യ  തുടങ്ങിയ രാജ്യങ്ങളിലെ പ്രധാന സര്‍വകലാശാലകളുടെ സംയുക്താഭിമുഖ്യത്തില്‍ നടത്തുന്ന കോണ്‍ഫറന്‍സില്‍  ഇന്ത്യയടക്കം വിവിധ രാജ്യങ്ങളിലെ ഇസ്‌ലാമിക സര്‍വകലാശാലാ വി.സിമാരും അക്കാദമിക  ഗവേഷകരുമാണ് പ്രധാന പ്രബന്ധാവതാരകര്‍. ആഗോളീകരണ കാലത്ത് ഇസ്‌ലാമിക ഉന്നത വിദ്യാഭ്യാസ  മേഖലയിലെ മിതവാദ ചിന്തകള്‍ എന്ന വിഷയത്തിലാണ് നദ്‌വിയുടെ  പ്രബന്ധം.  സുല്‍ത്താന്‍ ശരീഫ് അലി  ഇസ്‌ലാമിക്  യൂനിവേഴ്‌സിറ്റിയുടെയും ബ്രൂണെ ദാറുസ്സലാം യൂനിവേഴ്‌സിറ്റിയുടെയും അധികൃതരുമായി  കൂടിക്കാഴ്ച നടത്തുന്ന നദ്‌വി ഇരു യൂനിവേഴ്‌സിറ്റികളുമായുള്ള ദാറുല്‍ഹുദായുടെ അക്കാദമിക  സഹകരണത്തിനുള്ള ധാരണാപത്രത്തില്‍ ഒപ്പുവയ്ക്കുകയും ചെയ്യും.