കോഡൂര്‍: ഓണം വാരാഘോഷത്തിനോടനുബന്ധിച്ച് ഒറ്റത്തറയില്‍ ഏകദിന ചെളി ഫുട്‌ബോള്‍ മത്സരം നടന്നു. സ്‌കൂള്‍പടി ഫ്രണ്ട്‌സ് ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബാണ് 'മഡ്മസ 2016' എന്ന പേരില്‍ ചെളി ഫുട്ബാള്‍ മത്സരം സംഘടിപ്പിച്ചത്. ഫുട്‌ബോള്‍ പ്രേമികളുടെ നാടായ കോഡൂരില്‍ ചെളി പന്തുകളിക്കുള്ള കാണികളുടെ ആധിക്യം പ്രദേശത്തെ ഉത്സവമാക്കി മാറ്റി.
കോഡൂര്‍, പൊന്‍മള പഞ്ചായത്തുകളില്‍ നിന്നായി പത്തു ടീമുകളാണു മത്സരത്തില്‍ പങ്കെടുത്തത്. റിയല്‍ ചോലക്കല്‍ ഒന്നാം സ്ഥാനവും റിജന്‍സി ഒറ്റത്തറ രണ്ടാംസ്ഥാനവും നേടി മത്സരത്തില്‍ ജേതാക്കളായി.
കളിക്കാരെ പരിചയപ്പെട്ട് പഞ്ചായത്തംഗം മച്ചിങ്ങല്‍ മുഹമ്മദ് മത്സരം ഉദ്ഘാടനം ചെയ്തു. വിജയികള്‍ക്കുള്ള ട്രോഫിയും പ്രൈസ് മണിയും ബ്ലോക്ക് പഞ്ചായത്തംഗം എം.കെ. മുഹ്‌സിന്‍ വിതരണം ചെയ്തു. ഹംസക്കുട്ടി ഉമ്മത്തൂര്‍, യു. സൈതലവി, അബ്ദുല്‍ നാസര്‍ ഉമ്മത്തൂര്‍, ഹസൈന്‍ വില്ലന്‍ എന്നിവര്‍ സംസാരിച്ചു.