എടപ്പാള്‍: കൂരട റേഷന്‍കടയുടെ സമീപത്തെ പൊട്ടക്കിണറ്റില്‍ അജ്ഞാതര്‍ മാലിന്യം തള്ളി. ദുര്‍ഗന്ധത്തെ തുടര്‍ന്നു നാട്ടുകാര്‍ അധികൃതര്‍ക്കു കൂട്ട പരാതി നല്‍കി. ഇവിടെ ആളൊഴിഞ്ഞ പറമ്പിലെ പൊട്ടക്കിണറ്റിലാണ് കോഴിയവശിഷ്ടങ്ങളും ഇറച്ചിമാലിന്യങ്ങളും മറ്റും തള്ളിയത്.
ഇവ ചീഞ്ഞളിഞ്ഞു ദുര്‍ഗന്ധം വന്നതോടെയാണ് പരിസരവാസികള്‍ രംഗത്തുവന്നത്. സമീപവാസിയായ അലി മുസ്‌ലിയാരുടെ നേതൃത്വത്തിലുള്ള നാട്ടുകാരുടെ സംഘമാണ് വിഷയത്തില്‍ ഇടപെടണമെന്നും പരിഹാരമുണ്ടാക്കണമെന്നും ആവശ്യപ്പെട്ടു തവനൂര്‍ പഞ്ചായത്ത് സെക്രട്ടറിക്കും തവനൂര്‍ ഹെല്‍ത്ത് ഇന്‍സ്‌പെക്ടര്‍ക്കും പരാതി നല്‍കിയത്. നേരത്തെയും ഇത്തരത്തില്‍ സംഭവമുണ്ടായപ്പോള്‍ പരാതി നല്‍കിയിരുന്നെങ്കിലും പരിഹാരമായിരുന്നില്ല.