തളിപ്പറമ്പ് : കുറ്റിക്കോലിലെ രജീഷിനെ വധിച്ചകേസില്‍ അറസ്റ്റിലായ രാഗേഷിനെ കേസിലെ അഞ്ച് സാക്ഷികള്‍ തിരിച്ചറിഞ്ഞു. ഇന്നലെ രാവിലെ 11 മണിക്ക് കണ്ണൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് മുമ്പാകെ കണ്ണൂര്‍ സബ്ജയിലിലാണ് തിരിച്ചറിയല്‍ പരേഡ് നടന്നത്.
കൊലപാതകത്തിനുപയോഗിച്ച കാറിലെ രക്തം കഴുകിക്കളഞ്ഞ സര്‍വ്വീസ് സെന്റര്‍ ജീവനക്കാരും, പറശിനി സ്‌കൂളിലെ ചില ജീവനക്കാരുമാണ് സാക്ഷികള്‍. ദൃക്‌സാക്ഷികള്‍ ഇല്ലാത്ത കേസായതിനാല്‍ ശാസ്ത്രീയ തെളിവുകള്‍ കണ്ടെത്തുന്നതിന്റെ ഭാഗമായ നടപടിക്രമമായാണ് പൊലിസ് തിരിച്ചറിയല്‍ പരേഡ് നടത്തിയത്.കൂടുതല്‍ തെളിവെടുപ്പിനായി പ്രതിയെ കസ്റ്റഡിയിലാവശ്യപ്പെടും. ചുരുങ്ങിയ ദിവസം കൊണ്ട് തന്നെ അന്വേഷണം പൂര്‍ത്തിയാക്കി കുറ്റപത്രം സമര്‍പ്പിക്കാനുള്ള ശ്രമത്തിലാണ് കേസന്വേഷിക്കുന്ന തളിപ്പറമ്പ് സി.ഐ.കെ.ഇ പ്രേമചന്ദ്രനും സംഘവും.