പയ്യന്നൂര്‍: നൂറു കണക്കിന് ശിഷ്യര്‍ക്ക് വരയുടെ പാഠങ്ങള്‍ പകര്‍ന്നു നല്‍കിയ ശ്രീനു ഗോപാലന്‍ വിട പറഞ്ഞതോടെ കലാ കേരളത്തിന് നഷ്ടമായത് വരയുടെ ഗുരുവിനെ. പെയിന്റിങ്ങിലും ഡ്രോയിങ്ങിലും ഡിപ്ലോമ നേടിയ ശ്രീനു ഗോപാലന്‍ മൈസൂര്‍ റീജ്യനല്‍ കോളജ് ഓഫ് എജ്യുക്കേഷനില്‍ നിന്ന് ഫൈന്‍ ആര്‍ട്‌സില്‍ ബിരുദവും നേടി. കേരള ചിത്രകലാ പരിഷത്ത്, ചിത്രകലാ അധ്യാപക സംഘടന, കേരള സ്‌കൂള്‍ ഓഫ് ആര്‍ട്‌സ് എന്നിവയുടെ ഭാരവാഹിയായും പ്രവര്‍ത്തിച്ചിരുന്നു. ഭാരത സര്‍ക്കാടിന്റെ വിദ്യാഭ്യാസ മന്ത്രാലയം സംഘടിപ്പിച്ച നാഷണല്‍ ഫിസിക്കല്‍ എഫിഷ്യന്‍സി മത്സരത്തില്‍ രണ്ടു തവണ ശ്രീനു ഗോപാലന്‍ ദേശീയ ബഹുമതി നേടിയിട്ടുണ്ട്. നാലു വര്‍ഷം മുമ്പ് അദ്ദേഹത്തിന്റെ എണ്‍പതാം പിറന്നാള്‍ ദിനത്തില്‍ കേരള ലളിതകലാ അക്കാദമി വീട്ടിലെത്തി പുരസ്‌കാരം ആദരിച്ചിരുന്നു.