കുമ്പള: ഉമ്മ ശകാരിച്ചതിനു വീടു വിട്ടിറങ്ങിയ 16 കാരിയായ വിദ്യാര്‍ഥിനി മുംബൈയിലുള്ളതായി അന്വേഷണ സംഘത്തിനു വിവരം ലഭിച്ചു. തുടര്‍ന്നു പൊലിസ് സംഘം മുംബൈയിലേക്ക് പോയി. കണ്ണാടിപ്പാറ കിദക്കാറിലെ പ്ലസ് വണ്‍ വിദ്യാര്‍ഥിനിയെയാണു തിങ്കളാഴ്ച രാവിലെ മുതല്‍ കാണാതായത്. ഉമ്മ വഴക്കു പറഞ്ഞതിനു പിണങ്ങിയിരിക്കുകയായിരുന്നു.
താന്‍ വീട്ടിലേക്കില്ലെന്നും എവിടെയെങ്കിലും പോകുമെന്നും പെണ്‍കുട്ടി ഒന്‍പതാം ക്ലാസില്‍ പഠിക്കുന്ന സഹോദരനോടു പറഞ്ഞിരുന്നു. പെണ്‍കുട്ടിക്ക് മൊബൈല്‍ ഫോണ്‍ ഉണ്ടായിരുന്നില്ല. പരാതി ലഭിച്ചതിനെ തുടര്‍ന്നു കുമ്പള സി.ഐ വി.വി മനോജിന്റെ നേതൃത്വത്തില്‍ മംഗളൂരു കേന്ദ്രീകരിച്ച് അന്വേഷണം നടത്തിവരുന്നതിനിടയിലാണ് പെണ്‍കുട്ടി മുംബൈയില്‍ ഉള്ളതായി വിവരം ലഭിക്കുന്നത്. ട്രെയിനില്‍ ഒറ്റപ്പെട്ട നിലയില്‍ കണ്ടെത്തിയ പെണ്‍കുട്ടിയോട് സഹയാത്രികരായ ഒരു കുടുംബത്തിലെ സ്ത്രീകള്‍ കാര്യങ്ങള്‍ ചോദിച്ചപ്പോഴാണ് വീട് വിട്ടതാണെന്നു മനസ്സിലായത്. അവര്‍ വീട്ടിലേക്കു വിളിച്ചു വിവരങ്ങള്‍ കൈമാറി.
പൊലിസ് പെണ്‍കുട്ടിയെ സുരക്ഷിതമായി എവിടെയെങ്കിലും താമസിപ്പിക്കണമെന്ന് ആവശ്യപ്പെട്ടതിനാല്‍ പെണ്‍കുട്ടിയുടെ മുംബൈയിലുള്ള ബന്ധുക്കളുടെ വീട്ടില്‍ നിര്‍ത്തിയിരിക്കുകയാണ്.