കോഴിക്കോട്: ഗവ. ഹോമിയോ മെഡിക്കല്‍ കോളജിനോടനുബന്ധിച്ച് ആശുപത്രിക്കു പുതിയ കെട്ടിടം നിര്‍മിക്കുന്നു. തിരക്കൊഴിവാക്കുന്നതിനൊപ്പം രോഗികള്‍ക്കു കൂടുതല്‍ സൗകര്യങ്ങള്‍ ലഭ്യമാക്കുക എന്ന ലക്ഷ്യത്തോടെയാണു പുതിയ കെട്ടിടം നിര്‍മിക്കുന്നത്. മെഡിക്കല്‍ കോളജും ആശുപത്രിയും ഒരേ കെട്ടിടത്തില്‍ പ്രവര്‍ത്തിക്കുന്നതാണ് ഇപ്പോഴുള്ള അസൗകര്യത്തിനു കാരണം.
എട്ടുനില കെട്ടിടത്തിന്റെ ആദ്യ നാലുനിലകളുടെ നിര്‍മാണപ്രവൃത്തിയാണ് ഇപ്പോള്‍ നടക്കുക. 10.55 കോടി രൂപയാണ് ഇതിനായി മാറ്റിവച്ചിരിക്കുന്നത്. ഡിജിറ്റല്‍ എക്‌സറേ, ഇ.സി.ജി, ക്ലിനിക്കല്‍ ലബോറട്ടറി, ഫിസിയോ തെറാപ്പി, പെയിന്‍ ആന്‍ഡ് പാലിയേറ്റിവ് കെയര്‍ യൂനിറ്റ് എന്നിവ നിലവില്‍ ആശുപത്രിയില്‍ പ്രവര്‍ത്തിച്ചുവരുന്നുണ്ട്.
ആശുപത്രിയുടെ പുതിയ കെട്ടിടത്തിന്റെ ശിലാസ്ഥാപനം നാളെ ഉച്ചയ്ക്കു രണ്ടിന് കോളജ് ഓഡിറ്റോറിയത്തില്‍ ആരോഗ്യ കുടുംബക്ഷേമ മന്ത്രി കെ.കെ ശൈലജ ടീച്ചര്‍ നിര്‍വഹിക്കും. എ. പ്രദീപ്കുമാര്‍ എം.എല്‍.എ അധ്യക്ഷനാകും. വാര്‍ത്താസമ്മേളനത്തില്‍ മെഡിക്കല്‍ കോളജ് പ്രിന്‍സിപ്പല്‍ ഡോ. സി.ടി അനിലകുമാരി, ആശുപത്രി സൂപ്രണ്ട് ഡോ. കെ.എല്‍ ബാബു, ഡോ. റിതേഷ്, കെ.കെ ഷൈജു പങ്കെടുത്തു.