കല്‍പ്പറ്റ: തീര്‍ഥാടന കേന്ദ്രമായ ചീങ്ങേരി സെന്റ് മേരീസ് യാക്കോബായ സുറിയാനി പള്ളിയില്‍  യല്‍ദോ മാര്‍ ബസേലിയോസ് ബാവായുടെ ഓര്‍മപ്പെരുന്നാല്‍ നാളെ മുതല്‍ ആരംഭിക്കും. പെരുന്നാള്‍ ദിവസങ്ങളില്‍ എല്ലാ ദിവസവും കുര്‍ബാനയും 27 മുതല്‍ 30 വരെ വൈകിട്ട് സുവിശേഷ മഹായോഗവും നടക്കും. നാളെ രാവിലെ ഒമ്പതിന് കൊടി ഉയര്‍ത്തും. തുടര്‍ന്ന് ഫിനിക്‌സ് സഹായനിധിയുടെ ആഭിമുഖ്യത്തില്‍ നടത്തുന്ന 25 ലക്ഷം രൂപയുടെ കാന്‍സര്‍ ചികിത്സാ സഹായനിധിയുടെ കാന്‍സര്‍ ബോധവല്‍കരണ സെമിനാറും പച്ചക്കറിതൈ വിതരണവും നടക്കും. സെമിനാറിന് കല്‍പ്പറ്റ ലിയോ ആശുപത്രിയിലെ ഡോ. ഷുഹൈബ് നേതൃത്വം നല്‍കും. സുവിശേഷ മഹായോഗത്തിന് തൃശൂരില്‍ പ്രവര്‍ത്തിക്കുന്ന കിഡ്‌നി ഫെഡറേഷന്‍ ഓഫ് ഇന്ത്യയുടെ ചെയര്‍മാനായ ഫാ. ഡേവിസ് ചിറമ്മേല്‍, പെരുമ്പാവൂര്‍ ബെദ്‌സൈദ മാനസികാരോഗ ആശുപത്രിയിലെ കൗണ്‍സിലിംഗ് സൈക്കോളജിസ്റ്റ് ഫാ. എബി വര്‍ക്കി ഞെളിയംപറമ്പില്‍ എന്നിവര്‍ നേതൃത്വം നല്‍കും.
25ന് കുര്‍ബാനക്ക് ശേഷം 10.30ന് രക്തദാന ക്യാംപ്, ഉച്ചക്ക് 1.30 ന് അഖില വയനാട് ചിത്രരചനാമത്സരം എന്നിവയും നടക്കും. പള്ളിവികാരി ഫാ. ബിജുമോന്‍ ജേക്കബ് കര്‍ലോട്ട്കുന്നേല്‍, ഫാ. ഷിബു കുറ്റിപറിച്ചേല്‍, ട്രസ്റ്റി എ.കെ ഏബ്രഹാം അതിരംപുഴയില്‍, സെക്രട്ടറി മാത്യു കടവില്‍, ജനറല്‍ കണ്‍വീനര്‍ ജോസ് പെരുമ്പള്ളില്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.