മോഷ്ടാക്കളുടെ അക്രമത്തില്‍ ഒമ്പതാംക്ലാസുകാരന് പരുക്ക്
അഞ്ചാലൂംമൂട്: അഞ്ചാലുമ്മൂട്ടില്‍ കഴിഞ്ഞദിവസം അര്‍ധരാത്രിയില്‍ മൂന്നിടത്ത് മോഷണം. മോഷ്ടാക്കളുടെ അക്രമത്തില്‍ ഒമ്പതാംക്ലാസുകാരന് ഗുരുതര പരുക്കേറ്റു.   
മൂന്ന് വീടുകളില്‍ നിന്നായി പത്തുപവനോളം അപഹരിച്ചു. പനയം ചോനംചിറ, ചെമ്മക്കാട് മാടന്‍കാവ്, അഞ്ചാംകുറ്റി എന്നിവിടങ്ങളിലാണ്
കഴിഞ്ഞ ദിവസം രാത്രി 12നും മൂന്നിനും ഇടയില്‍ മോഷണം നടന്നത്.
ചോനംചിറ കുത്തിരത്തറ അജ്മല്‍ മന്‍സിലില്‍ അബ്ദുള്‍ഗഫീറിന്റെ വീട്ടിലാണ് ആദ്യം മോഷണം നടന്നത്. അബ്ദുള്‍ ഗഫൂര്‍ വീടിന്റെ സിറ്റൗട്ടില്‍ കിടന്നു ഉറങ്ങുന്നതിനിടെ വീടിന്റെ പിന്‍വശത്തെ വാതില്‍ തുറന്ന് അകത്ത് കയറിയ മോഷ്ടാക്കള്‍ ഉറങ്ങി കിടന്ന ഭാര്യ ഷംലയുടെ കഴുത്തില്‍ കിടന്ന മൂന്നര പവന്റെ സ്വര്‍ണമാല അപഹരിക്കുകയായിരുന്നു. ഷംലയുടെ ബഹളം കേട്ട് വീട്ടുകാരും പരിസരവാസികളും   ഓടിയെത്തിയെങ്കിലും മോഷ്ടാക്കള്‍ പിന്‍വശത്തെ വാതിലിലുടെ രക്ഷപ്പെട്ടു.
തുടര്‍ന്ന് അവിടെ നിന്നും ഒന്നരകിലോമീറ്റര്‍ അകലെ ചെമ്മക്കാട് മാടന്‍കാവിന് സമീപം വിജയലക്ഷ്മി ഭവനത്തില്‍ ശ്രീലക്ഷ്മിയുടെ വീട്ടില്‍ കയറിയ മോഷ്ടാക്കള്‍ അലമാര കുത്തിത്തുറന്നു. അലമാരയില്‍ ഒന്നും ഇല്ലെന്ന് മനസ്സിലാക്കിയ മോഷ്ടാക്കള്‍ മുകളിലത്തെ റൂമിലെത്തി ഉറങ്ങി കിടന്ന ശ്രീലക്ഷ്മിയുടെയും രണ്ട് പവന്റെ മാലയും അരപവന്റെ മോതിരവും അമ്മ രാധയുടെ ഒന്നര പവന്റെ മാലയും അപഹരിച്ചു. ഇവര്‍ ഉണര്‍ന്നപ്പൊഴേക്കും ശ്രീലക്ഷ്മിയുടെ ചെകിടത്ത് അടിച്ച ശേഷം പിന്‍വശത്തെ വാതിലിലൂടെ രക്ഷപ്പെട്ടു. ഇവിടെ രാത്രി രണ്ടേകാലോടെയായിരുന്നു മോഷണം നടന്നത്. പിന്നീട് ചെമ്മക്കാട് മഹാവിഷ്ണു  ക്ഷേത്രത്തിന് സമീപമുള്ള സജിയുടെ വീട്ടിലായിരുന്നു മോഷണം. പിന്‍വശത്തെ വാതില്‍ തുറന്ന് അകത്ത്
കയറിയ മോഷ്ടാക്കള്‍ മുകളിലത്തെ നിലയില്‍  ഉറങ്ങി കിടന്ന സജിയുടെ ഭാര്യ ബിനുവിന്റെ കഴുത്തിലെ മൂന്ന് പവന്റെ മാലയും രണ്ട് പവന്റെ വളയും അപഹരിച്ചു.
വീട്ടുകാര്‍ ഉണര്‍ന്നപ്പോഴേക്കും മോഷ്ടാക്കള്‍  താഴത്തെ നിലയിലേക്ക് ഇറങ്ങിയോടി. ഇവരെ പിടികൂടാന്‍ പിന്തുടരുന്നതിനിടെയാണ് സജിയുടെ  മകന്‍ ഒമ്പതാംക്ലാസുകാരനായ  നിഖിലിന് പരുക്കേറ്റത്.  പിന്നാലെ ഓടിയെത്തിയ നിഖിലിനെ മോഷ്ടാക്കള്‍ ക്രിക്കറ്റ് ബാറ്റും ടോര്‍ച്ചും കൊണ്ട് തലയ്ക്കടിക്കുകയായിരുന്നു.
കൊല്ലം എസിപി ജോര്‍ജ്ജ് കോശി, സി.ഐ. ഇഎസ്.ബിജു, വെസ്റ്റ് എസ്.ഐ. വിനോദ്, അഞ്ചാലൂംമൂട് എസ്.ഐ.പ്രശാന്ത്, സ്‌പെഷ്യല്‍ സ്‌ക്വാഡ് അംഗം എഎസ്‌ഐ ജോസ്പ്രകാശ് എന്നിവരുടെ നേതൃത്വത്തിലുള്ള പൊലീസ് സംഘം സ്ഥലത്തെത്തി പരിശോധന നടത്തി. വിരലടയാള വിദഗ്ദരും സ്ഥലത്തെത്തി തെളിവുകള്‍ ശേഖരിച്ചു.