റിയാദ്: സഊദിയുടെ താമസിച്ചിരുന്ന യമന്‍ ഔദ്യോഗിക ഗവണ്മെന്റ് നേതാവും പ്രധാനമന്ത്രിയുമായ അഹ്മദ് ഉബൈദ് ബിന്‍ ദാഗിര്‍ റിയാദില്‍ നിന്നും രാഷ്ട്രീയ അഭയം അവസാനിപ്പിച്ചു യമനിലേക്ക് മടങ്ങി.


റിയാദില്‍ സഊദി ഗവണ്‍മെന്റിനെ കീഴില്‍ രാഷ്ട്രീയ വാസം നടത്തിയിരുന്ന ഇദ്ദേഹം യമനിലെ പ്രമുഖ പട്ടണമായ ഏദനില്‍ ഇന്നലെയാണ് എത്തിയത്. യമനിലെ വിമത വിഭാഗമായ ഹൂതികളില്‍ നിന്നും രാജ്യത്തെ പൂര്‍ണ്ണമായും മോചിപ്പിക്കുകയെന്ന ലക്ഷ്യത്തോടെയാണ് രഷ്ട്രീയ അഭയം അവസാനിപ്പിച്ചു ഏദനിലേക്ക് വീണ്ടും മടങ്ങുന്നതെന്നു അദ്ദേഹം മാധ്യമങ്ങളോട് വ്യക്തമാക്കി.

    കഴിഞ്ഞ വര്‍ഷം യമനില്‍ സഖ്യ സര്‍ക്കാരിനെതിരെ നീങ്ങിയ ശീഈ ഹൂതികള്‍ക്കെതിരെ സഊദിയുടെ നേതൃത്വത്തില്‍ യുദ്ധം തുടങ്ങിയ വേളയില്‍ യമന്‍ പ്രസിഡന്റ് അബ്ദു റബ്ബ് മന്‍സൂര്‍ ഹാദിയും അദ്ദേഹത്തിന്റെ കീഴിലെ ഭരണ നേതൃത്വവും റിയാദില്‍ രാഷ്ട്രീയ അഭയം നേടിയിരുന്നു.


പിന്നീട് ഒന്നര വര്‍ഷത്തെ യുദ്ധത്തിന് ശേഷം തലസ്ഥാന നഗരിയായ സന്‍അ യും മറ്റു പ്രധാന സ്ഥലങ്ങളും ഔദ്യോഗിക സേനയുടെ കീഴില്‍ ആയതിനെ തുടര്‍ന്ന് രാഷ്ട്രീയ അഭയം അവസാനിപ്പിച്ചു ഇവരില്‍ പലരും  നേരത്തെ തന്നെ യമനില്‍ എത്തിയിരുന്നു.


കനത്ത ആക്രമണം നടക്കുന്ന യമനില്‍ സമാധാന പുനഃസ്ഥാപനത്തിനായി ഐക്യ രാഷ്ട്ര സഭയുടെ നേതൃത്വത്തില്‍ സമാധാന കരാര്‍ നടപ്പിലാക്കാന്‍ വീണ്ടും കടുത്ത ശ്രമം ആരംഭിച്ചിട്ടുണ്ട്.നേരത്തെ പല തവണ വിവിധ രാഷ്ട്രങ്ങളുടെ നേതൃത്വത്തില്‍ സമാധാന ചര്‍ച്ചകള്‍ നടന്നുവെങ്കിലും അതെല്ലാം അലസുകയായിരുന്നു.