സുല്‍ത്താന്‍ ബത്തേരി: സ്വര്‍ണ്ണമെന്ന വ്യാജേന മുക്കുപണ്ടം വില്‍ക്കാനെത്തിയ മൂന്ന് പേരെ പിടികൂടി പൊലിസിലേല്‍പ്പിച്ചു. ബത്തേരിയിലെ ജ്വല്ലറികളില്‍ വില്‍പനക്കെത്തിയ വെള്ളമുണ്ട സ്വദേശികളായ റജില്‍(28), സജേഷ് (27), ഷിബു (35) എന്നിവരെയാണ് ജ്വല്ലറി ഉടമകള്‍ പിടികൂടിയത്. ഇവരില്‍ നിന്ന് വില്‍പനയ്ക്കായി കൊണ്ടുവന്ന മുക്കുപണ്ടങ്ങളും ഇവര്‍ വന്ന കാറും പൊലിസ് കസ്റ്റഡിയിലെടുത്തിട്ടുണ്ട്. ഇന്നലെ വൈകിട്ടാണ് സംഭവം. ബത്തേരിയിലെ ഒരു ജ്വല്ലറിയില്‍ വില്‍പ്പനക്കായി കൊണ്ടുവന്ന പണ്ടം വാങ്ങുന്നതിന് മുമ്പ് പരിശോധിച്ചപ്പോള്‍ മുക്ക്പണ്ടമാണ് മനസ്സിലായതോടെ ജ്വല്ലറി ഉടമ പൊലിസില്‍ വിവരം അറിയിക്കുകയുമായിരുന്നു. കഴിഞ്ഞ ദിവസം മാനന്തവാടിയിലും ഇവര്‍ മുക്ക് പണ്ടം വില്‍പ്പന നടത്തിയതായി പൊലിസിന് വിവരം ലഭിച്ചതായാണ് സൂചന. ഇവരെ പൊലിസ് ചോദ്യം ചെയ്തുവരികയാണ്.