മണലൂര്‍: കാഞ്ഞാണി ബസ്സ്റ്റാന്‍ഡിലെ അനധികൃത പാര്‍ക്കിങ് നീക്കം ചെയ്യണമെന്ന് ഹൈക്കോടതി ഉത്തരവായി. പൊതു പ്രവര്‍ത്തകനായ എം.വി അരുണ്‍ നല്‍കിയ ഹര്‍ജി പരിഗണിച്ച ജസ്റ്റിസ് വിനോദ് ചന്ദ്രനാണ് തൃശൂര്‍ റൂറല്‍ എസ്.പിക്ക് ഇതു സംബന്ധിച്ച നിര്‍ദേശം നല്‍കിയത്. ദിവസം 200 ഓളം ബസുകള്‍ സര്‍വിസ് നടത്തുകയും അത്ര തന്നെ വ്യാപാര സ്ഥാപനങ്ങള്‍ പ്രവര്‍ത്തിക്കുകയും ചെയ്യുന്നതാണ് ഈ സ്റ്റാന്‍ഡ്. അവിടെയാണ് അനധികൃത പാര്‍ക്കിങ് നടക്കുന്നത്. ഇതിനെതിരെയാണ് അഡ്വ. സി.എ അനൂപ് മുഖേന അരുണ്‍ ഹൈക്കോടതിയെ സമീപിച്ചത്. ആവശ്യത്തിന് പൊലിസിനെ നിയോഗിക്കണമെന്നും റൂറല്‍ എസ്.പിക്ക് നിര്‍ദേശം നല്‍കിയിട്ടുണ്ട്. അനധികൃത പാര്‍ക്കിങിനെതിരെ മണലൂര്‍ ഗ്രാമപഞ്ചായത്ത് ഭരണസമിതി രംഗത്ത് വന്നിരുന്നു. പാര്‍ക്കിങിന് കൃത്യമായ സ്ഥലം അടയാളപ്പെടുത്തി സൗകര്യമൊരുക്കിയിരുന്നുവെങ്കിലും നൂറ് കണക്കിന് വാഹനങ്ങള്‍ നിയമങ്ങള്‍ തെറ്റിച്ച് പാര്‍ക്കിങ് തുടരുന്നതിനിടയിലാണ് ഹൈക്കോടതി ഇടപെടല്‍ ഉണ്ടായിരിക്കുന്നത്. സ്റ്റാന്‍ഡിന്റെ ഇരു കവാടങ്ങളിലും പാര്‍ക്കിങ് അനധികൃതമായി തുടരുന്നതിനാല്‍ ബസുകള്‍ പ്രവേശിക്കുന്നതിനും മറ്റും ബുദ്ധിമുട്ടുകയാണ്.