കാക്കനാട്: ഹോട്ടലിന്റെ അടുക്കളയിലെ ഗ്യാസ് സിലിണ്ടറില്‍ നിന്നും തീ പടര്‍ന്നത് ഭീതിയിലാഴ്ത്തി. ഇന്നലെ രാവിലെ 10.30 മണിക്ക് ജയപ്രകാശിന്റെ ഉടമസ്ഥതയിലുളള കാക്കനാട് ഇന്‍ഫൊ പാര്‍ക്ക് റോഡിലെ അയോധ്യ ഹോട്ടലിലാണ് സംഭവം.പാചകം ചെയ്യുന്നതിനിടെ ഗ്യാസിന് ചോര്‍ച്ച ഉണ്ടായതിനെ തുടര്‍ന്ന് തീ പടരുകയായിരുന്നു. ജീവനക്കാര്‍ തീ അണക്കുവാന്‍ ശ്രമിച്ചെങ്കിലും ഫലം കാണാത്തതിനാല്‍ തൃക്കാക്കര ഫയര്‍ സ്റ്റേഷനില്‍ നിന്നും ഫയര്‍മാന്‍ സജിത്കുമാറിന്റെ നേതൃത്വത്തിലുള്ള സംഘമെത്തി തീയണക്കുകയായിരുന്നു.
അടുക്കളയില്‍ ഉണ്ടായിരുന്ന മറ്റ് രണ്ട് നിറകുറ്റികളിലേക്ക് തീ പടരാതിരുന്നതിനാലും, ഹോട്ടലിലും, ഈ കെട്ടിടത്തിലെ തന്നെ ബേക്കറിയിലും, ഭക്ഷണം കഴിക്കുവാന്‍ എത്തിയവരെയും മാറ്റിയതിനാല്‍ വന്‍ അപകടം ഒഴിവായി. അടുക്കള പൂര്‍ണ്ണമായും കത്തി നശിച്ചെന്നും അധികൃതര്‍ വ്യക്തമാക്കി.