ഇസ്്‌ലാമാബാദ്: പാക് സൈനിക മേധാവി ജനറല്‍ റഹീല്‍ ശരീഫ് നവംബറില്‍ വിരമിക്കാനിരിക്കെ പുതിയ മേധാവിയെ കണ്ടെത്താനാകാതെ പാക് പ്രധാനമന്ത്രി നവാസ് ശരീഫ് വിഷമവൃത്തത്തില്‍. ജനസമ്മതനായ മേധാവിയെ തീരുമാനിക്കാനായില്ലെങ്കില്‍ സൈനിക അട്ടിമറിക്ക് പോലും സാധ്യതയുണ്ടെന്നാണ് റിപ്പോര്‍ട്ടുകള്‍. അടുത്ത ആഴ്ചയോടെ പുതിയ മേധാവിയെ പ്രധാനമന്ത്രി പ്രഖ്യാപിച്ചേക്കുമെന്നാണ് റിപ്പോര്‍ട്ടുകള്‍.
നാല് ലെഫ്റ്റനന്റ് ജനറല്‍ മാരില്‍ ഒരാളാണ് പുതിയ മേധാവിയാകുക. എന്നാല്‍ റഹീലിനെ പോലെ എല്ലാവര്‍ക്കും സമ്മതനായ ഒരാളെ കണ്ടെത്താന്‍ കഴിഞ്ഞിട്ടില്ല. ഇന്ത്യ സൈനികമായി തിരിച്ചടിച്ചേക്കാമെന്ന ഭീതിയും യു.എസ് പാക് ബന്ധത്തില്‍ പിന്നോക്കം പോയതുമായ സാഹചര്യവുമാണ് നവാസ് ശരീഫിനു മുന്നിലുള്ള പുതിയ പ്രതിസന്ധി.
സ്ഥാനം ഒഴിഞ്ഞാലും റഹീല്‍ ശരീഫ് ചില അധികാരങ്ങള്‍ കൈയടക്കിവയ്ക്കാമെന്നും സര്‍ക്കാര്‍ വൃത്തങ്ങളെ ഉദ്ധരിച്ച് പാക് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നത്. റഹീല്‍ ശരീഫും നവാസ് ശരീഫും തമ്മില്‍ ഇപ്പോള്‍ നല്ല ബന്ധമല്ല ഉള്ളതെന്ന വാര്‍ത്തയും പുറത്തുവരുന്നുണ്ട്.
ഈയിടെ റഹീല്‍ ശരീഫ് പട്ടാള അട്ടിമറിയിലൂടെ ഭരണം പിടിച്ചെടുക്കണമെന്ന് ആവശ്യപ്പെട്ട് മൂവ് ഓണ്‍ പാകിസ്താന്‍ എന്ന പാര്‍ട്ടി രാജ്യവ്യാപകമായി പോസ്റ്ററുകള്‍ പതിച്ചിരുന്നു. ഭീകരവാദികള്‍ക്കും അഴിമതിക്കും എതിരേ ശക്തമായ നടപടിയാണ് റഹീല്‍ സ്വീകരിക്കുന്നതെന്ന അഭിപ്രായവും ജനങ്ങള്‍ക്കിടയിലുണ്ട്.
ഈ സാഹചര്യത്തിലാണ് സൈനിക അട്ടിമറി അഭ്യൂഹങ്ങള്‍ ശക്തമായത്. എന്നാല്‍ അത്തരം സാധ്യതകളെ പാക് സൈന്യം തള്ളിക്കളഞ്ഞു.
ഊഹാപോഹങ്ങള്‍ അവസാനിപ്പിക്കാന്‍ സൈനിക വക്താവ് ലെഫറ്റനന്റ് ജനറല്‍ അസിം ബജ്വ ആവശ്യപ്പെട്ടു. എന്നാല്‍ മാധ്യമങ്ങള്‍ക്ക് ജനറല്‍ റഹീലിന്റെ അഭിമുഖം ഉടന്‍ ലഭിക്കില്ലെന്നും സൈന്യം അറിയിച്ചു.
ഇപ്പോഴത്തെ പ്രധാനമന്ത്രി നവാസ് ഷെരീഫിനെ തന്നെ പുറത്താക്കിയാണ് 1999 ല്‍ പര്‍വേസ് മുശാര്‍റഫിന്റെ നേതൃത്വത്തില്‍ പാകിസ്താനില്‍ സൈനിക അട്ടിമറി നടന്നിരുന്നു.