ചെറുപുഴ/പയ്യന്നൂര്‍: ചെറുപുഴ- പയ്യന്നൂര്‍ റോഡ് അറ്റകുറ്റപ്പണി നടത്താത്തതിനെതിരേ യു.ഡി.എഫും, ബി.ജെ.പിയും രംഗത്തുവന്നതിനു പിന്നാലെ സി.പി.എം അണികളും എം.എല്‍.എയെ വിമര്‍ശിച്ച് രംഗത്തുവന്നതോടെ മലയോരമേഖലയില്‍ റോഡ് വിവാദം കത്തുന്നു. ഇന്നലെ ചെറുപുഴ, പെരിങ്ങോം വയക്കര പഞ്ചായത്തുകളിലെ യു.ഡി.എഫ് ജനപ്രതിനിധികളും നേതാക്കളും പയ്യന്നൂര്‍ പൊതുമരാമത്ത് വകുപ്പ് ഓഫിസിനു മുന്നില്‍ കുത്തിയിരിപ്പ് സമരം നടത്തിയിരുന്നു. തുടര്‍ന്ന് ഗതാഗതം സുഗമമാക്കുന്നതിനായി താല്‍ക്കാലിക സംവിധാനം ഒരുക്കുമെന്ന് പൊതുമരാമത്ത് വകുപ്പ് അധികൃതര്‍ നേതാക്കളെ അറിയിച്ചു. ഇതിനു പിന്നാലെ വിഷയം ഏറ്റെടുത്തു കൊണ്ട് ബി.ജെ.പി ഇന്ന് രണ്ട് പഞ്ചായത്തുകളില്‍ ഹര്‍ത്താല്‍ നടത്തുമെന്നും പ്രഖ്യാപിച്ചിരിക്കുകയാണ്. ചെറുപുഴ, പെരിങ്ങോം പഞ്ചായത്തുകളിലാണ് റോഡിന്റെ ശോചനീയാവസ്ഥ പരിഹരിക്കാത്തതില്‍ പ്രതിഷേധിച്ച് ബി.ജെ.പി ഹര്‍ത്താലിന് ആഹ്വാനം ചെയ്തിരിക്കുന്നത്. രാവിലെ ആറുമുതല്‍ വൈകുന്നേരം ആറുമണി വരെയാണ് ഹര്‍ത്താല്‍. പാല്‍, പത്രം, ആശുപത്രി എന്നിവ ഹര്‍ത്താലില്‍ നിന്നു ഒഴിവാക്കിയതായി ഭാരവാഹികള്‍ അറിയിച്ചു. യു.ഡി.എഫ് നടത്തിയ കുത്തിയിരിപ്പു സമരത്തിനു ചെറുപുഴ പഞ്ചായത്ത് പ്രസിഡന്റ് ജമീല കോളയത്ത്, ഇബ്രാഹിം പൂമംഗലം, കെ.കെ സുരേഷ്, സി.എച്ച് റഫീഖ്, പി.വി കുഞ്ഞമ്പു നായര്‍, രവി പൊന്നംവയല്‍, നേതൃത്വം നല്‍കി.