പട്ടാമ്പി: വിവിധ സ്‌കോളര്‍ഷിപ്പുകള്‍ക്കായി ബാങ്കില്‍ നിന്നും തുക കൈപ്പറ്റുന്നതിനും വിദ്യാര്‍ഥികളുടെ അക്കാദമിക കാര്യങ്ങളിലെ ബന്ധപ്പെട്ടവക്കും യു.ഐ.ഡി നമ്പര്‍ നിര്‍ബന്ധമാക്കിയതിനാല്‍ ക്ലാസ് അധ്യാപകര്‍ വിദ്യാര്‍ഥികളില്‍ നിന്ന് യു.ഐ.ഡി നമ്പറുകള്‍ വാങ്ങണമെന്ന് വിദ്യഭ്യാസ ഉപഡയറക്ടര്‍മാര്‍ പ്രധാനധ്യാപകര്‍ക്ക് നിര്‍ദേശം നല്‍കി.
ആധാര്‍ കാര്‍ഡ് ലഭിച്ചിട്ടില്ലാത്ത വിദ്യാര്‍ഥികള്‍ക്ക് അക്ഷയകേന്ദ്രങ്ങളില്‍ നിന്നോ വിദ്യാലയങ്ങളില്‍ നിന്നോ കാര്‍ഡ് ലഭിക്കുന്നതിനുള്ള നടപടികള്‍ കൈകൊള്ളണമെന്നും അറിയിച്ചിട്ടുണ്ട്. സ്‌കോളര്‍ഷിപ്പ് തുകകള്‍ ബാങ്ക് വഴി ലഭ്യമാകണമെങ്കില്‍ യു.ഐ.ഡി നമ്പര്‍ നല്‍കണമെന്ന നിര്‍ദേശം നിലവില്‍ ഉണ്ട് . ഈ നിര്‍ദേശം ആധാര്‍കാര്‍ഡ് ഇല്ലാത്ത വിദ്യാര്‍ഥികള്‍ക്ക് സ്‌കോളര്‍ഷിപ്പ് തുക നഷ്ടപ്പെടുമെന്ന സാഹചര്യം നിലനില്‍ക്കുന്നതിനെ സംബന്ധിച്ചുള്ള വാര്‍ത്ത സുപ്രഭാതം പ്രസിദ്ധീകരിച്ചിരുന്നു. പ്രധാനധ്യാപകര്‍ക്ക് ബുധനാഴ്ച വിദ്യാലയങ്ങളിലെ മെയില്‍വഴി യു.ഐ.ഡി നമ്പര്‍ വിദ്യാര്‍ഥികളില്‍ നിന്ന് വാങ്ങണമെന്ന സന്ദേശം വിദ്യഭ്യാസ ഉപഡയറക്ടര്‍ ഓഫിസില്‍ നിന്നും ലഭിച്ചത്.