തിരുവന്തപുരം: 200കോടി രൂപയുടെ ടോട്ടല്‍ ഫോര്‍ യു തട്ടിപ്പു കേസില്‍ പ്രതി ശബരീനാഥിന് 20 വര്‍ഷം തടവും 8.28 കോടി രൂപ പിഴയും വിധിച്ചു. തിരുവനന്തപുരം അഡീഷണല്‍ ചീഫ് ജുഡീഷല്‍ മജിസ്‌ട്രേറ്റ് കോടതിയാണ് ശിക്ഷ വിധിച്ചത്. രണ്ട് കേസുകളിലാണു ശിക്ഷ. ശിക്ഷ ഒന്നിച്ച് അനുഭവിച്ചാല്‍ മതി. പിഴയൊടുക്കിയില്ലെങ്കില്‍ ഒരു വര്‍ഷം കൂടി ജയിലില്‍ കഴിയേണ്ടിവരും. മറ്റു കേസുകളില്‍ വിചാരണ തുടരും.
ശബരിനാഥിനെതിരേ ഒന്‍പത് കുറ്റപത്രങ്ങളിലായി 33 കേസുകളാണ് നിലവിലുള്ളത്. ഇതില്‍ ഏഴരക്കോടിയുടെ രണ്ട് തട്ടിപ്പുകേസുകളില്‍ ശബരിനാഥ് കോടതിയില്‍ കുറ്റസമ്മതം നടത്തിയിരുന്നു. ഈ കേസുകളിലാണ് ഇപ്പോള്‍ ശിക്ഷ വിധിച്ചത്. ശബരിനാഥ് അടക്കം 20 പേര്‍ പ്രതികളായ രണ്ടുകേസുകളിലും ഒന്‍പത് പേര്‍ സ്ത്രീകളാണ്. 2008ലാണ് ടോട്ടല്‍ ഫോര്‍ യു തട്ടിപ്പുമായി ബന്ധപ്പെട്ടു ശബരീനാഥ് അടക്കമുള്ളവര്‍ അറസ്റ്റിലായത്.