ആലക്കോട്: മൂന്നാംകുന്നില്‍ കൂറ്റന്‍ പാറകള്‍ ജനവാസ പ്രദേശത്ത് പതിച്ചത് പ്രദേശവാസികളെ ഭീതിയിലാഴ്ത്തി. വെള്ളിയാഴ്ച പുലര്‍ച്ചെ ഒരു മണിയോടെയാണ് സംഭവം. മലമുകളില്‍ നിന്നുള്ള രണ്ട് കൂറ്റന്‍ പാറകള്‍ ജനവാസ പ്രദേശത്ത് ഉരുണ്ടെത്തിയത്. ഭീകരശബ്ദത്തോടെ ഉരുണ്ടെത്തിയ പാറകള്‍ മൂന്നാംകുന്ന് എസ് വളവ് കോളനിക്ക് മുകളില്‍ തങ്ങി നിന്നതിനാലാണ് വന്‍ദുരന്തം ഒഴിവായത്. നിരവധി കുടുംബങ്ങള്‍ തിങ്ങിപാര്‍ക്കുന്ന പ്രദേശമായതിനാല്‍ ഏറെ ആശങ്കയിലാണ് നാട്ടുകാര്‍. ചെറിയൊരു അനക്കമുണ്ടായാല്‍ പാറകള്‍ വീണ്ടും ഉരുണ്ടെത്തുമെന്ന് ഇവര്‍ ഭയപ്പെടുന്നു. രണ്ട് കിലോമീറ്റര്‍ മുകളിലുള്ള ആനപ്പാറയില്‍ നിന്നാണ് ആദ്യം പാറ ഉരുണ്ടെത്തിയത്. തുടര്‍ന്ന് അര മണിക്കൂറിനുള്ളില്‍ തൊട്ടടുത്ത ഇളച്ചിപായ് മലയിലെ കൂറ്റന്‍ പാറയും താഴേക്ക് പതിച്ചു. പാറകള്‍ ഉരുണ്ടു വന്ന പ്രദേശത്തെ കൃഷിയിടങ്ങള്‍ പൂര്‍ണമായും നശിച്ചു. ചാമക്കാലായില്‍ കുഞ്ഞ്, കാട്ടീരകത്ത് ബെയ്ത്താന്‍ മൊയ്തു എന്നിവരുടെ കൃഷിയിടങ്ങളില്‍ കൂടിയാണ് പാറകള്‍ താഴേക്ക് പതിച്ചത്. ലക്ഷങ്ങളുടെ കൃഷി നാശമുണ്ടായി. ആലക്കോട് പഞ്ചായത്ത് വൈസ് പ്രസിഡന്റ് സി മോഹനന്‍, മെംബര്‍ പി.സി ആയിഷ എന്നിവരുടെ നേതൃത്വത്തില്‍ പഞ്ചായത്ത് അധികൃതര്‍ സ്ഥലത്തെത്തി സ്ഥിതിഗതികള്‍ വിലയിരുത്തി. പാറകള്‍ പൊട്ടിച്ചുമാറ്റാനുള്ള നടപടികള്‍ അടിയന്തരമായി സ്വീകരിക്കുമെന്ന് അധികൃതര്‍ അറിയിച്ചു.