ഡെറാഡൂണ്‍: പാകിസ്താനെ സര്‍ജറിക്ക് ശേഷം ബോധം തെളിയാത്ത രോഗിയോട് ഉപമിച്ച് പ്രതിരോധ മന്ത്രി മനോഹര്‍ പരിക്കര്‍.

ഇന്ത്യയുടെ സര്‍ജിക്കല്‍ സ്‌ട്രൈക്കിന് ശേഷം ബോധം തെളിയാത്ത രോഗിയുടെ അവസ്ഥയിലാണ് ഇപ്പോള്‍ പാകിസ്താനെന്ന പരിഹാസവുമായാണ് പ്രതിരോധ മന്ത്രി മനോഹര്‍ പരീക്കര്‍ രംഗത്തെത്തിയത്.

നിയന്ത്രണരേഖ മറികടന്ന് പാക്ക് അധീന കശ്മീരിലെ ഭീകരവാദ കേന്ദ്രങ്ങളില്‍ ഇന്ത്യ നടത്തിയ മിന്നലാക്രമത്തിന് ശേഷം ഇപ്പോഴും എന്താണ് സംഭവിച്ചെത് എന്ന് ഇപ്പോഴും പാകിസ്താന് മനസ്സിലായിട്ടില്ലെന്ന് അദ്ദേഹം പറഞ്ഞത്.

പാക് അധീന കശ്മീരില്‍ ഇന്ത്യ നടത്തിയ മുന്നേറ്റത്തെ കുറിച്ച് അന്വേഷിക്കാന്‍ പാക്കിസ്ഥാന്‍ ഇതുവരെ തയ്യാറായിട്ടില്ല. കാരണം എന്താണ് സംഭവിച്ചത് എന്നറിയാത്ത അവസ്ഥയിലാണ് ഇപ്പോഴും പാകിസ്താന്‍. ഇന്ത്യയുടെ നിശബ്ദദ ബലഹീനതയായി കണക്കാക്കുന്ന പാക്കിസ്താന്റെ സമീപനത്തെ പ്രതിരോധ മന്ത്രി രൂക്ഷമായി ഭാഷയില്‍ വിമര്‍ശിച്ചു.

ഇനിയും ഇന്ത്യക്കെതിരായ ഗൂഢാലോചനകള്‍ പാക്കിസ്താന്റെ ഭാഗത്തുനിന്നുണ്ടായാല്‍ ഇന്ത്യ ശക്തമായി പ്രതികരിക്കുമെന്നും പരീക്കര്‍ മുന്നറിയിപ്പ് നല്‍കി. പാക് അധിനിവേശ കശ്മീരിലെ ഇന്ത്യന്‍ സൈന്യം നടത്തിയ ആക്രമണത്തിന് ശേഷം ഈ വിഷയത്തില്‍ ആദ്യമായി പ്രതികരിക്കുകയായിരുന്നു പ്രതിരോധ മന്ത്രി.

ഇന്ത്യ സമാധാനം ആഗ്രഹിക്കുന്ന രാജ്യമാണ്. പ്രകോപനമില്ലാത്ത ആക്രമണത്തില്‍ ഇന്ത്യക്ക് വിശ്വാസമില്ല. എന്നാല്‍ എങ്ങനെ പകരം വീട്ടണമെന്ന് ഇന്ത്യന്‍ സൈന്യത്തിനറിയാമെന്നും അത് ബോധ്യപെടുത്താനാണ് ഇപ്പോഴത്തെ ആക്രമണമെന്നും പരീക്കര്‍ പറഞ്ഞു.

ബുധനാഴ്ച അര്‍ധരാത്രിക്ക് ശേഷമാണ് ഇന്ത്യ പാക് അതിര്‍ത്തി കടന്ന സര്‍ജിക്കല്‍ സ്‌ട്രൈക്ക് നടത്തിയത്. ആക്രമണ വാര്‍ത്ത ആദ്യം പാകിസ്താന്‍ നിഷേധിച്ചിരുന്നു. തുടര്‍ച്ചയായി ഇന്ത്യയുടെ സൈനിക കേന്ദ്രങ്ങളെ ഭീകരര്‍ ആക്രമണം നടത്തിയതിനെ തുടര്‍ന്നാണ് പാകിസ്താനെതിരെ ഇന്ത്യ മിന്നലാക്രമണം നടത്തിയത്.