ഗുഹാവതി; ഇന്ത്യന്‍ സൂപ്പര്‍ ലീഗ് ഫുട്‌ബോള്‍ ടൂര്‍ണമെന്റിന്റെ മൂന്നാം സീസണിലെ ഉദ്ഘാടന മത്സരത്തില്‍ കേരള ബ്ലാസ്റ്റേഴ്‌സിന് തോല്‍വി. ഏകപക്ഷീയമായ ഒരു ഗോളിനാണ് നോര്‍ത്ത് ഈസ്റ്റ് യുണൈറ്റഡ് കേരളാ ബ്ലാസ്റ്റേഴ്‌സിനെ തോല്‍പിച്ചത്.

ഇന്ത്യന്‍ ഫുട്‌ബോള്‍ ആരാധകരുടെ ആവേശമായ ഐ.എസ്.എല്‍ പോരാട്ടങ്ങളുടെ തുടക്കം സ്വന്തമാക്കിയ നോര്‍ത്ത് ഈസ്റ്റ് യുണൈറ്റഡിന് തന്നെയായിരുന്നു കളിയിലുടനീളം ആധിപത്യം. നോര്‍ത്ത് ഈസ്റ്റ് യുണൈറ്റഡിന്റെ സ്വന്തം തട്ടകമാണ് ഗുവാഹത്തി.

ആദ്യ പകുതിയില്‍ ഇരുടീമുകളും പ്രതിരോധത്തിലൂന്നിയപ്പോള്‍ ഗോള്‍ വല കുലുങ്ങിയില്ല. ആരാധകര്‍ മിടിപ്പോടെയാണ് ഓരോ മിനിറ്റും കളി വീക്ഷിച്ചത്. 55 മത്തെ മിനിറ്റിലാണ് നോര്‍ത്ത് ഈസ്റ്റ് യുണൈറ്റഡ് മലയാളികളുടെ ആവേശമായ ബ്ലാസ്റ്റേഴ്‌സിന്റെ വല കുലുക്കിയത്.

നോര്‍ത്ത് ഈസ്റ്റിനായി ജപ്പാന്‍ താരം കത് സൂമി യൂസയാണ് ഗോള്‍ സ്വന്തമാക്കിയത്. നിക്കോളാസ് വെലസിന്റെ പാസില്‍ കത് സൂമി പന്തിനെ കൃത്യമായി വലയിലെത്തിക്കുകയായിരുന്നു. പിന്നീടങ്ങോട്ട് ഒരുപിടി മികച്ച മുന്നേറ്റങ്ങള്‍ നടത്തിയ ബ്ലാസ്റ്റേഴ്‌സ്, കൂടുതല്‍ ഗോള്‍ വഴങ്ങാതിരിക്കാന്‍ പ്രതിരോധത്തിലും പിടിമുറുക്കി. എന്നാല്‍ നോര്‍ത്ത് ഈസ്റ്റിന്റെ തട്ടകത്തില്‍ അവരെ സമനിലയില്‍ തളക്കുകയെന്ന ലക്ഷ്യത്തിലേക്ക് ബ്ലാസ്റ്റേഴ്‌സിന് എത്താനായില്ല.

മഞ്ഞയും നീലയും ജഴ്‌സിയിലാണ് ബ്ലാസ്‌റ്റേഴ്‌സ് ഗുവാഹത്തിയിലെ ഇന്ദിരാ ഗാന്ധി സ്‌റ്റേഡിയത്തില്‍ ഇറങ്ങിയത്. വെള്ള ജഴ്‌സിയില്‍ നോര്‍ത്ത് ഈസ്റ്റും ഗ്രൗണ്ടിലിറങ്ങിയത്. ആദ്യ അരമണിക്കൂറില്‍ ഗോള്‍ നേടാന്‍ ഇരു ടീമിനും കഴിഞ്ഞില്ല. മികച്ച പ്രകടനം കാഴ്ചവെക്കാന്‍ ഒരുങ്ങിയിറങ്ങിയ ബ്ലാസ്റ്റേഴ്‌സ് പ്രതീക്ഷക്കനുസരിച്ച് ഉയരാത്തത് ആരാധകരെ നിരാശപെടുത്തിയിട്ടുണ്ട്.