പെരിങ്ങത്തൂര്‍ (കണ്ണൂര്‍): തീവ്രവാദ ബന്ധമുള്ളവര്‍ ഒളിച്ചിരിക്കുന്നുണ്ടെന്ന വിവരത്തെത്തുടര്‍ന്ന് എന്‍.ഐ.എ സംഘം പാനൂരിനടുത്ത് കനകമലയില്‍ പരിശോധനയ്‌ക്കെത്തി. അഞ്ചു പേരെ ഇവിടെ നിന്ന് കസ്റ്റഡിയിലെടുത്തിട്ടുണ്ട്. ഇവരില്‍ രണ്ടു പേര്‍ തമിഴ്‌നാട് സ്വദേശികളാണെന്നാണ് സൂചന.

ഉച്ചയ്ക്കു പന്ത്രണ്ടോടെയാണ് എന്‍.ഐ.എ ഐ.ജി അനുരാജ് തങ്കിന്റെ നേതൃത്വത്തിലുള്ള സംഘം പരിശോധനയ്‌ക്കെത്തിയത്. മൂന്നു ഡി.വൈ.എസ്.പിമാരും സംഘത്തിലുണ്ടായിരുന്നു.

സംശയമുള്ളവരുടെ മൊബൈല്‍ ഫോണ്‍ ടവര്‍ ലൊക്കേഷന്‍ പരിശോധിച്ചാണു സംഘമെത്തിയത്. പാനൂര്‍, ചൊക്ലി പൊലിസും സ്ഥലത്തുണ്ട്. വിവമരമറിഞ്ഞ് വന്‍ ജനക്കൂട്ടം സ്ഥലത്ത് തടിച്ചുകൂടി.

ജനങ്ങളുടെയും മാധ്യമപ്രവര്‍ത്തകരുടെയും കണ്ണുവെട്ടിച്ചാണ് കസ്റ്റഡിയിലെടുത്തവരെ കൊണ്ടുപോയത്. ഇവരെക്കുറിച്ചുള്ള വിവരങ്ങള്‍ പുറത്തുവിട്ടിട്ടില്ല.