നരിക്കുനി: പൊതുമരാമത്ത് വകുപ്പിനു കീഴില്‍ വരുന്ന നരിക്കുനി-കാക്കൂര്‍ റോഡ് ശോചനീയാവസ്ഥയില്‍. 20 വര്‍ഷം മുന്‍പ് മൂന്നു മീറ്റര്‍ വീതിയില്‍ ടാര്‍ ചെയ്ത റോഡ് പൊട്ടിപ്പൊളിഞ്ഞ് കിടക്കുകയാണ്.
    പത്തോളം ബസുകള്‍ കടന്നുപോകുന്ന ഈ റോഡിലൂടെയാണ് കാക്കൂര്‍ ഭാഗത്ത് നിന്നും മെഡിക്കല്‍ കോളജിലേക്ക് പോകുന്നത്. സ്‌കൂള്‍ വിദ്യാര്‍ഥികള്‍ക്കും കാക്കൂര്‍ പി.എച്ച്.സി യിലേക്കുമുള്ളവര്‍ക്കും ഈ റോഡ് മാത്രമാണ് ആശ്രയം.  നരിക്കുനി പൊതുമരാമത്ത് ഓഫിസില്‍ ആവശ്യത്തിന് ജീവനക്കാരില്ലാത്തതും റോഡിന്റെ ശോചനീയാവസ്ഥ തുടരാന്‍ കാരണമായിട്ടുണ്ട്.
വര്‍ഷം തോറും നടക്കുന്ന കുഴിയടയ്ക്കല്‍ മൂലം റോഡ് യാത്രകള്‍ ദുസ്സഹമായിരിക്കുകയാണ്. രണ്ടു വാഹനങ്ങള്‍ക്ക് സൈഡ് കൊടുക്കാന്‍ പോലും സൗകര്യമില്ല.    റോഡിന്റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് ജനതാദള്‍ (യു) കണ്ടോത്ത്പാറ യൂനിറ്റിന്റെ ആഭിമുഖ്യത്തില്‍ കണ്ടോത്തുപാറയില്‍ സായാഹ്ന ധര്‍ണ നടത്തി.  കൊടുവള്ളി നിയോജക മണ്ഡലം പ്രസിഡണ്ട് ചോലക്കര മുഹമ്മദ് മാസ്റ്റര്‍ ഉദ്ഘാടനം ചെയ്തു. ജില്ലാ കമ്മിറ്റി അംഗം ടി.കെ. കുഞ്ഞൂട്ടി അധ്യക്ഷത വഹിച്ചു. കെ. അബ്ദുറഹിമാന്‍, ടി.വി അബൂബക്കര്‍, സി. രജീഷ്, അബ്ദുല്‍ ഗഫൂര്‍, ഷമീര്‍. എം.വി തുടങ്ങിയവര്‍ സംസാരിച്ചു. കെ. സര്‍ജാസ് സ്വാഗതവും ടി.കെ. ബിജു നന്ദിയും പറഞ്ഞു.