തൃശൂര്‍: ടോള്‍ കമ്പനിയുടെ ഏജന്റായാണ് മുഖ്യമന്ത്രി പിണറായി വിജയന്‍ പ്രവര്‍ത്തിക്കുന്നതെന്ന് പരിസ്ഥിതി പ്രവര്‍ത്തകനും ആം ആദ്മി പാര്‍ട്ടി കണ്‍വീനറുമായ സി.ആര്‍ നീലകണ്ഠന്‍ ആരോപിച്ചു. പൊതുജനങ്ങള്‍ക്ക് സഞ്ചരിക്കാനായി ജില്ലാ കലക്ടര്‍ ഉത്തരവിട്ട റോഡ് കഴിഞ്ഞദിവസം രാത്രിയില്‍ പൊലിസ് കാവലില്‍ അടച്ചുപൂട്ടാന്‍ ടോള്‍ കമ്പനി അധികൃതര്‍ക്ക് അവസരമൊരുക്കിയത് ഇതിന്റെ തെളിവാണ്.
രാഷ്ട്രീയ തീരുമാനമാണ് പാലിയേക്കരയില്‍ കഴിഞ്ഞദിവസം നടപ്പാക്കപ്പെട്ടതെന്നും അദ്ദേഹം പറഞ്ഞു. നിയമം നടപ്പാക്കാന്‍ ബാധ്യതപ്പെട്ടവര്‍ നിയമലംഘനത്തിന് വഴിയൊരുക്കുകയാണ് ചെയ്തത്. സഞ്ചാരയോഗ്യമല്ല എന്നാരോപിച്ചാണ് പാലിയേക്കരയിലെ സമാന്തരപാത അടച്ചുകെട്ടിയത്. മന്ത്രി കൂടിയായ സ്ഥലം എം.എല്‍.എ സി രവീന്ദ്രനാഥിന്റെ എം.എല്‍.എ ഫണ്ടില്‍ നിന്നും 94 ലക്ഷം രൂപ ചെലവഴിച്ചാണ് റോഡ് സഞ്ചാരയോഗ്യമാക്കിയത്.
റോഡ് സഞ്ചാരയോഗ്യമാണെന്ന പി.ഡബ്ല്യു.ഡി അധികൃതരുടെ റിപ്പോര്‍ട്ടിന്റെ അടിസ്ഥാനത്തിലാണ് രണ്ട് ദിവസം മുമ്പ് ജില്ലാ കലക്ടര്‍ റോഡ് തുറന്നുകൊടുക്കാന്‍ നിര്‍ദേശം നല്‍കിയത്. ഇതേ തുടര്‍ന്ന് ജനങ്ങളുടെ നേതൃത്വത്തില്‍ തന്നെ റോഡ് തുറക്കുകയായിരുന്നു. ആ റോഡാണ് തിങ്കളാഴ്ച ഉച്ചമുതല്‍ ജെ.സി.ബി വഴിയില്‍ നിര്‍ത്തി ഗതാഗതം മുടക്കി ഇന്നലെ പുലര്‍ച്ചെ പൊലിസ് സഹായത്തോടെ അടച്ചുകെട്ടിയത്. ഇരുചക്രവാഹനയാത്രികര്‍ക്ക് പോലും കഷ്ടിച്ച് കടന്നുപോകാന്‍ കഴിയുന്ന വിധത്തിലാണ് റോഡ് അടച്ചുകെട്ടിയിരിക്കുന്നത്. പാലിയേക്കര ടോള്‍ പ്ലാസയില്‍ കൊള്ളയാണ് നടക്കുന്നതെന്ന് പറഞ്ഞ മന്ത്രി വി.എസ് സുനില്‍കുമാറും ടോളിനെതിരാണ് എന്ന് പറയുന്ന മന്ത്രി രവീന്ദ്രനാഥും നയം വ്യക്തമാക്കണമെന്നും നീലകണ്ഠന്‍ ആവശ്യപ്പെട്ടു.
പ്രവര്‍ത്തകരായ ജിജോ, നിഷാദ്, രാജേഷ് എന്നിവരും വാര്‍ത്താ സമ്മേളനത്തില്‍ പങ്കെടുത്തു.