മഞ്ചേരി: കിണറില്‍ വീണ അന്യസംസ്ഥാന തൊഴിലാളിയെ മഞ്ചേരി അഗ്നിശമനസേന രക്ഷപ്പെടുത്തി. ഉത്തര്‍പ്രദേശ്  ജമല്‍മിര്‍സാപൂര്‍ സ്വദേശി അര്‍ജുനന്റെ മകന്‍ രഘുവരനാ(51)ണ് ഇന്നലെ രാവിലെ ആറോടെ മഞ്ചേരി ഗേള്‍സ്  സ്‌കൂളിന് സമീപത്തെ ആലപ്പി പാര്‍സല്‍ സര്‍വീസിന് പിറകിലുള്ള കിണറില്‍  വീണത്.   ചെറിയതോതില്‍ മാനസികാസ്വാസ്ഥ്യമുള്ള ഇയാള്‍ കൂട്ടുകാരുമായി വഴക്കിട്ട് ഇവര്‍ താമസിക്കുന്ന മുറിയില്‍ നിന്നിറങ്ങി ഓടുകയായിരുന്നു. ഈ സമയത്ത് അബദ്ധത്തില്‍ കിണറില്‍ വീണതാണെന്നാണു പറയുന്നത്. ഉടന്‍ മഞ്ചേരി ഫയര്‍ഫോഴ്‌സ് അധികൃതര്‍ സ്ഥലത്തെത്തി.
ഫയര്‍മാന്‍ മുഹമ്മദ്കുട്ടി കിണറിലിറങ്ങി രഘുവരനെ കരക്കെത്തിക്കുകയായിരുന്നു.  നിസാര പരുക്കേറ്റ ഇയാളെ മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

അസി.സ്റ്റേഷന്‍ മാസ്റ്റര്‍ പി.ടി ഉമ്മറിന്റെ നേതൃത്വത്തില്‍ എം അബ്ദുല്‍ കരീം, ഇ.എം അബ്ദുല്‍ റഫീഖ്, പി.മുഹമ്മദ് ശാഫി, മണികണ്ഠന്‍ എന്നിവരും സംഘത്തിലുണ്ടായിരുന്നു.