സാധാരണ രീതിയില്‍ നടന്നാല്‍ വണ്ടിയുടെ സമയത്തിനു മുന്‍പെ സ്റ്റേഷനിലെത്താന്‍ പറ്റുന്ന ഇടവേള വച്ചാണ് അവര്‍ വീട്ടില്‍ നിന്നു പുറപ്പെട്ടത്. അയാളും പ്രായം ചെന്ന അമ്മയും ഭാര്യയും പതിനൊന്നു വയസുള്ള മകളും. പക്ഷെ ആ അമ്മ മുട്ടുവേദന നിമിത്തം വളരെ പ്രയാസപ്പെട്ടായിരുന്നു നടന്നിരുന്നത്. സ്റ്റേഷനടുത്തപ്പോള്‍ അവരുടെ വഴിയില്‍ എതിരെ നിന്നു നടന്നുവന്ന ഒരാള്‍ ചോദിച്ചു: ഈ വണ്ടിക്ക് പോകാനാണോ? അയാള്‍ നടത്തത്തിന്റെ വേഗത ഒട്ടും കുറയ്ക്കാതെ തലയാട്ടി. എന്നാല്‍ വേഗം നടന്നോളൂ. അയാളതും പറഞ്ഞ് ഒരിടവഴിയിലേക്കിറങ്ങിപ്പോയി.. അവര്‍ നടത്തത്തിന്റെ വേഗത ഒന്നുകൂടി കൂട്ടിയപ്പോള്‍ അമ്മ വളരെ പിറകിലായി. അയാള്‍ നിന്നു കിതപ്പടക്കി പിറകിലോട്ടു തിരിഞ്ഞു വിളിച്ചു; അമ്മേ, ഒന്ന് വേഗം നടക്കെന്റമ്മേ... ആ അമ്മ കിതപ്പു കൊണ്ട് ഒരു ചവിട്ടു മുന്നോട്ടുവയ്ക്കാനാവാത്ത അവസ്ഥയിലായി. സ്റ്റേഷന്റെ ഗെയിറ്റ് കയറുമ്പോള്‍ കൊച്ചു മകള്‍ പിറകിലോട്ടു തിരിഞ്ഞുവിളിച്ചു: ഗ്രാന്‍മാ... ധൃതിയില്‍ ടിക്കറ്റെടുക്കാന്‍ ക്യൂവിലേക്കു കയറിയ അയാളോടു ഭാര്യ പറഞ്ഞു: നിങ്ങളുടെ മദറെത്തിയില്ല. ഒന്ന് കുറച്ചെടുത്താല്‍ മതി. ടിക്കറ്റെടുത്ത് അവര്‍ പ്ലാറ്റ്‌ഫോമിലേക്ക് ഓടി. വണ്ടി വന്നു നില്‍ക്കുന്നുണ്ടായിരുന്നു. കുട്ടിയെ കയറ്റി ഭാര്യയുടെ പിറകെ അയാളും. വണ്ടി പതുക്കെ നീങ്ങിത്തുടങ്ങി. പിന്നീടത് അതിന്റെ വേഗതയാര്‍ന്ന പ്രയാണത്തിലേക്കു കടന്നു. ചെറിയൊരു ബീപ് സൗണ്ട് അലെര്‍ടില്‍ അയാള്‍ മൊബൈലെടുത്തു നോക്കി. അപ്പോള്‍ അതിലൊരു മെസേജ് ഫ്‌ളോട്ട് ചെയ്തിരുന്നു; താങ്കളുടെ അമ്മ ഇവിടെ താങ്കളെ കാത്തിരിക്കുകയാണ്...