കോഴിക്കോട്: കേരള ഐ.സി.എസ്.ഇ നോര്‍ത്ത് സോണ്‍ കലോത്സവത്തിന് സെന്റ് ജോസഫ്‌സ് ജൂനിയര്‍ ഐ.സി.എസ്.ഇ സ്‌കൂളില്‍ നാളെ തുടക്കമാകും. രണ്ട് വിഭാഗങ്ങളിലായി അറുനൂറോളം കുട്ടികള്‍ മത്സരത്തില്‍ പങ്കെടുക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
 ആറ് വേദികളിലായി നടക്കുന്ന കലാമത്സരങ്ങളുടെ രജിസ്‌റ്റ്രേഷന്‍ രാവിലെ ഒന്‍പതിന് ആരംഭിക്കും.
മേയര്‍ തോട്ടത്തില്‍ രവീന്ദ്രന്‍ കലോത്സവം ഉദ്ഘാടനം ചെയ്യും. സമ്മാനദാനവും സമാപനചടങ്ങ് ഉദ്ഘാടനവും ജില്ലാ കലക്റ്റര്‍ എന്‍. പ്രശാന്ത് നിര്‍വഹിക്കും.
ഇഗ്‌സൊ ഫെസ്റ്റിന്റെ ഭാഗമായി ഇന്ന് മാനാഞ്ചിറനിന്നും ആരംഭിക്കുന്ന വിളംബര ഘോഷയാത്ര സെന്റ് ജോസഫ്‌സ് സ്‌കൂളില്‍ സമാപിക്കും. സെന്റ് ജോസഫ്‌സ് ജൂനിയര്‍ ഐ.സി.എസ്.ഇ സ്‌കൂള്‍ പ്രിന്‍സിപ്പല്‍ ഫാദര്‍ സേവ്യര്‍ വെലിയകം, പി.ടി.എ പ്രസിഡന്റ് റാംസി ഇസ്‌മൈല്‍ വാര്‍ത്താസമ്മേളനത്തില്‍ പങ്കെടുത്തു.