മയ്യില്‍: വളപട്ടണം പാലത്തില്‍ അറ്റകുറ്റപ്പണി നടക്കുന്നതിനാല്‍ സമാന്തരപാതയായി ഉപയോഗിക്കുന്ന കാട്ടാമ്പള്ളി-കമ്പില്‍ റൂട്ടില്‍ മയ്യില്‍ പൊലിസിന്റെ വാഹന പരിശോധന ഗതാഗതം കൂടുതല്‍ സ്തംഭിപ്പിക്കാന്‍ കാരണമായി. പറശ്ശിനി-ധര്‍മ്മശാല റോഡിലേക്ക് തിരിയുന്ന കരിങ്കല്‍കുഴി പാടിക്കുന്നില്‍ ഇന്നലെ വൈകുന്നേരം അഞ്ചോടെയാണ് മയ്യില്‍ പൊലിസ് യാത്രക്കാരെ കുരുക്കിലാക്കിയത്. ഇരുചക്ര വാഹങ്ങള്‍ക്ക് കൂടാതെ ചരക്ക് ലോറികള്‍ വരെ പരിശോധനയ്ക്ക് വേണ്ടി ഇവിടെ തടഞ്ഞുവച്ചിരുന്നു. തളിപ്പറമ്പ് ഭാഗത്തേക്ക് പോകുന്ന യാത്രക്കാര്‍ക്കാണ് കൂടുതല്‍ ബുദ്ധിമുട്ട് അനുഭവിക്കേണ്ടി വന്നത്. വീതികുറഞ്ഞതും ഏറെ വളവുകളുമുള്ള ഈ റോഡില്‍ കൂടി പണിപ്പെട്ടാണ് വാഹനങ്ങള്‍ കടന്നു പോകുന്നത്. നാട്ടുകാര്‍ ചേര്‍ന്നാണ് വാഹനങ്ങളെ നിയന്ത്രിക്കുന്നത്. തിരക്കുള്ള സമയങ്ങളില്‍ ഗതാഗതം നിയന്ത്രിക്കാതെ പരിശോധനയ്ക്കു വേണ്ടി വാഹനങ്ങളെ തടഞ്ഞു നിര്‍ത്തിയ മയ്യില്‍ പൊലിസിന്റെ നടപടി പ്രതിഷേധത്തിന് ഇടയാക്കി.