മലയിന്‍കീഴ്: കാട്ടാക്കട നിയോജക മണ്ഡലത്തിലെ ജലക്ഷാമത്തിനു പരിഹാരം ലക്ഷ്യമിട്ടു നടപ്പാക്കുന്ന ജലസമൃദ്ധി പദ്ധതിയുടെ ഭാഗമായി മണ്ഡലത്തിലെ ആറു പഞ്ചായത്തുകളിലുമുള്ള സ്‌കൂളുകളില്‍ ജല ക്ലബുകള്‍ രൂപീകരിക്കാന്‍ സര്‍ക്കാര്‍ ഉത്തരവായി. ഇതു സംബന്ധിച്ചു ജില്ലാ വിദ്യാഭ്യാസ ഓഫിസര്‍മാര്‍ക്കും ഉപജില്ലാ വിദ്യാഭ്യാസ ഓഫിസര്‍മാര്‍ക്കും പൊതു വിദ്യാഭ്യാസ ഡയറക്ടര്‍ നിര്‍ദേശം നല്‍കി.
മൂന്ന് വര്‍ഷമാണു പദ്ധതിയുടെ കാലാവധി. മഴക്കൊയ്ത്ത്, മഴക്കുഴി നിര്‍മാണം, തടയണ നിര്‍മാണം, കിണറുകള്‍ റി ചാര്‍ജ് ചെയ്യല്‍, ജല ഗുണനിലവാരമുറപ്പാക്കല്‍, ജല സ്രോതസുകളുടെ സര്‍വേ നടത്തി ജല ഭൂപടം തയാറാക്കല്‍, ആറുകളും കുളങ്ങളുമുള്‍പ്പെടെയുള്ളവയുടെ സംരക്ഷണവും പദ്ധതി ലക്ഷ്യമിടുന്നുണ്ട്.
പദ്ധതിയുടെ നടത്തിപ്പും സംഘാടനവും സംബന്ധിച്ചു ചര്‍ച്ച ചെയ്യാന്‍ നേമം ബ്ലോക്ക് പഞ്ചായത്ത് ഹാളില്‍ ജന പ്രതിനിധികളുടെയുംഉദ്യോഗസ്ഥരുടെയും യോഗം ചേര്‍ന്നു. ഐ.ബി.സതീഷ് എം.എല്‍.എ പദ്ധതി വിവരിച്ചു. ഡോ.വി.സുഭാഷ് ചന്ദ്രബോസ് ജല സമൃദ്ധി വിഷയമവതരിപ്പിച്ചു.ജില്ലാ പഞ്ചായത്ത് അംഗം വി.ആര്‍.രമാകുമാരി അധ്യക്ഷയായി. പദ്ധതി കോ-ഓര്‍ഡിനേറ്റര്‍ ഡപ്യൂട്ടി കലക്ടര്‍ സവിത, ലാന്‍ഡ് യൂസ് ബോര്‍ഡ് അസിസ്റ്റന്റ് ഡയറക്ടര്‍ റോയ് മാത്യു, ജില്ലാ പഞ്ചായത്ത് അംഗങ്ങള്‍, ഗ്രാമ-ബ്ലോക്ക് പഞ്ചായത്ത് പ്രസിഡന്റുമാര്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
പദ്ധതി നടത്തിപ്പിനായി അയല്‍സഭകള്‍ മുതല്‍ മണ്ഡല തലം വരെ വിപുലമായ സംഘാടക സമിതികള്‍ രൂപീകരിക്കാന്‍ തീരുമാനിച്ചു. നവംബറില്‍ വാര്‍ഡ്തല-പഞ്ചായത്ത് തല സമിതികള്‍ നിലവില്‍ വരും. ലോക ജലദിനത്തില്‍ പദ്ധതി ഉദ്ഘാടനം ചെയ്യാനാണു ലക്ഷ്യമിടുന്നത്. ഇതിനു മുന്നോടിയായുള്ള പ്രവര്‍ത്തനങ്ങള്‍ സമയബന്ധിതമായി പൂര്‍ത്തിയാക്കാനും യോഗത്തില്‍ ധാരണയായി.