കൊടുങ്ങല്ലൂര്‍: ഡ്യൂട്ടിക്കിടയില്‍ മദ്യപിച്ചെത്തിയ ഗ്രേഡ് എ.എസ്.ഐയെ സ്റ്റേഷന്‍ എസ്.ഐ ഓടിച്ചിട്ട് പിടികൂടി. കൊടുങ്ങല്ലൂര്‍ പൊലിസ് സ്‌റ്റേഷനിലെ എ.എസ്.ഐ ബെന്നിയെയാണ് എസ്.ഐ മനോജ്.കെ.ഗോപി പിടികൂടിയത്. ഇയാളെ മെഡിക്കല്‍ പരിശോധനക്ക് വിധേയനാക്കുകയും സംഭവത്തെക്കുറിച്ച് മേലുദ്യോഗസ്ഥര്‍ക്ക് റിപ്പോര്‍ട്ട് നല്‍കുകയും ചെയ്തു. ഇന്നലെ വൈകീട്ട് 6 മണിയോടെയായിരുന്നു സംഭവം. സ്‌റ്റേഷനില്‍ എസ്.ഐയെ അന്വേഷിച്ച് എത്തിയ യുവാവിനോട് സ്‌റ്റേഷന്‍ പോര്‍ട്ടിക്കോവില്‍ നിന്നിരുന്ന എ.എസ്.ഐ തട്ടിക്കയറുകയായിരുന്നു. എ.എസ്.ഐ യുടെ പെരുമാറ്റത്തില്‍ സംശയം തോന്നിയ യുവാവ് മേലുദ്യോഗസ്ഥരോട് ഫോണില്‍ പരാതിപ്പെട്ടു. ഇതേ തുടര്‍ന്ന് സ്റ്റേഷനില്‍ ഉണ്ടായിരുന്ന എസ്.ഐ പുറത്തിറങ്ങി വന്നപ്പോള്‍ എ.എസ്.ഐ ഓടി രക്ഷപ്പെടാന്‍ ശ്രമിച്ചപ്പോള്‍ എസ്.ഐ പിന്‍തുടര്‍ന്ന് പിടികൂടുകയായിരുന്നു.