ചെറുപുഴ: ജില്ലാ കബഡി അസോസിയേഷന്റെയും ചെറുപുഴ സ്‌പോര്‍ട്‌സ് ഡവലപ്‌മെന്റ് അതോറിറ്റിയുടെയും നേതൃത്വത്തില്‍ ചെറുപുഴ സെന്റ് ജോസഫ്‌സ് ഹയര്‍ സെക്കന്‍ഡറി സ്‌കൂള്‍ ഇന്‍ഡോര്‍ സ്റ്റേഡിയത്തില്‍ നടന്നുവന്ന ജില്ലാ ജൂനിയര്‍ കബഡി മത്സരം സമാപിച്ചു. ആണ്‍കുട്ടികളുടെ വിഭാഗത്തില്‍ ഗാലക്‌സി കുണിയന്‍ ചാംപ്യന്‍മാരായി. നവശക്തി വെള്ളൂര്‍ രണ്ടാമതെത്തി. പെണ്‍കുട്ടികളുടെ വിഭാഗത്തില്‍ പ്രാപ്പൊയില്‍ കെ.വി സുധീഷ് സ്മാരക ക്ലബ് ജേതാക്കളായി. ഗവ. ഗേള്‍സ് ഹൈസ്‌കൂള്‍ പയ്യന്നൂര്‍ രണ്ടാം സ്ഥാനം നേടി. വിശിഷ്ടാതിഥികളെ ആനയിച്ച് രാവിലെ ചെറുപുഴ ടൗണില്‍ ടീമുകളുടെ മാര്‍ച്ച്പാസ്റ്റ് നടന്നു. പഞ്ചായത്ത് പ്രസിഡന്റ് ജമീല കോളയത്ത് ചാം  പ്യന്‍ഷിപ്പ് ഉദ്ഘാടനം ചെയ്തു. ജില്ലാ അസോസിയേഷന്‍ പ്രസിഡന്റ് കെ നാരായണന്‍ അധ്യക്ഷനായി. മുന്‍ പഞ്ചായത്ത് പ്രസിഡന്റ് റോഷി ജോസ് വിശിഷ്ടാതിഥിയായി. പഞ്ചായത്തംഗങ്ങളായ ലളിതാ ബാബു, മനോജ് വടക്കേല്‍, വി.എം ദാമോദരന്‍, ബിജു പുള്ളിക്കാട്ടില്‍, എം.വി ശശി സംസാരിച്ചു. ലണ്ടന്‍ ഒളിംപിക്‌സ് ഇന്ത്യന്‍ അത്‌ലറ്റിക് ടീം കോച്ച് റിട്ട. ക്യാപ്റ്റന്‍ കെ.എസ് മാത്യു, ഏഷ്യന്‍ ഗെയിംസ് കബഡി സ്വര്‍ണ മെഡല്‍ ജേതാവ് ജഗദീഷ് കുമ്പള, പരിശീലകന്‍ പ്രേംകുമാര്‍ വയലായ് എന്നിവരെ ആദരിച്ചു. വിജയികള്‍ക്ക് പഞ്ചായത്ത് വൈസ് പ്രസിഡന്റ് വി കൃഷ്ണന്‍, മദര്‍ സുപ്പീരിയര്‍ സിസ്റ്റര്‍ ജോസെറ്റ, ചെറുപുഴ എസ്.ഐ വി.ഡി രാധാകൃഷ്ണന്‍ എന്നിവര്‍ സമ്മാനങ്ങള്‍ നല്‍കി.