കരുനാഗപ്പളളി: നഗരസഭയെ നവംബറിന് മുമ്പ് തന്നെ വെളിയിട വിസര്‍ജനമുക്തമായി പ്രഖ്യാപിക്കുന്നതിന് നടപടികള്‍ വേഗത്തിലാക്കാന്‍ കഴിഞ്ഞ ദിവസം ചേര്‍ന്ന കൗണ്‍
സിലര്‍മാരുടെ യോഗം തീരുമാനിച്ചു.
നഗരസഭാ പരിധിയില്‍ 565 കുടുംബങ്ങള്‍ക്ക് ശുചിമുറിയില്ലെന്നാണ് സര്‍വേയില്‍ കണ്ടെത്തിയത്. ഓരോ ശുചിമുറിക്കും 15400 രൂപ വീതം നല്‍കിയാണ് നിര്‍മാണം പൂര്‍ത്തീകരിക്കുക. ഇതിന് 10067 രൂപ നഗരസഭയും 5333 രൂപ സ്വച്ഛ് ഭാരത് (അര്‍ബന്‍) വിഹിതമായും നല്‍കും. മൂന്ന് ഘട്ടങ്ങളിലായാണ് തുക അനുവദിക്കുക. ഗ്രാമ പഞ്ചായത്തുകളില്‍ നവംബറിന് മുന്‍പും, നഗരസഭകളില്‍ അടുത്ത മാര്‍ച്ചോടെയും ഒ.ഡി.എഫ് പ്രഖ്യാപിക്കുന്നതിനാണ് സംസ്ഥാന സര്‍ക്കാര്‍ തീരുമാനമെടുത്തിട്ടുളളത്. എന്നാല്‍
കരുനാഗപ്പള്ളി നഗരസഭ ഗ്രാമ പ്രദേശങ്ങളോടൊപ്പം നവംബറിന് മുന്‍പ് തന്നെ ഒ.ഡി.എഫ് പ്രഖ്യാപനം നടത്തുന്നതിനാണ് ലക്ഷ്യമിടുന്നതെന്ന് നഗരസഭ ചെയര്‍പേഴ്‌സണ്‍ എം.ശോഭന പറഞ്ഞു.
ശുചിമുറികള്‍ സമയബന്ധിതമായി പൂര്‍ത്തീകരിക്കുന്നതിന് നഗരസഭാവാര്‍ഡ് തലങ്ങളില്‍ പ്രവര്‍ത്തനങ്ങള്‍ ഊര്‍ജിതമാക്കും. കുടുംബശ്രീ, ആശാ പ്രവര്‍ത്തകരെയും സന്നദ്ധ സംഘടനാ പ്രവര്‍ത്തകരെയും ഉള്‍പ്പെടുത്തി വാര്‍ഡ് തലത്തില്‍ സഹായ സമിതികള്‍ രൂപീകരിച്ച് നിര്‍മാണ പ്രവര്‍ത്തനം വേഗത്തിലാക്കാന്‍ യോഗത്തില്‍ പദ്ധതി വിശദീകരിച്ച ജില്ലാ ശുചിത്വ മിഷന്‍ കോഓര്‍ഡിനേറ്ററായ അസിസ്റ്റന്റ് ഡവലപ്‌മെന്റ് കമ്മീഷണര്‍ ജി.കൃഷ്ണകുമാര്‍ പറഞ്ഞു.
വൈസ് ചെയര്‍പേഴ്‌സണ്‍ ഷക്കീല സലാം അധ്യക്ഷയായി. ആരോഗ്യ സ്ഥിരംസമിതി അധ്യക്ഷ സുബൈദ കുഞ്ഞുമോന്‍, സെക്രട്ടറി ഷെര്‍ലാബീഗം, ഹെല്‍ത്ത് ഇന്‍സ്‌പെക്ടര്‍ സലിംഷാ, നോഡല്‍ ഓഫീസര്‍ വി.എസ്. വിനോദ് എന്നിവര്‍ പ്രസംഗിച്ചു.