കല്യാണി: രഞ്ജി ട്രോഫിയിലെ ആദ്യ മത്സരത്തില്‍ ജമ്മു- കശ്മിരിനെതിരേ കേരളത്തിനു സമനില.  കേരളത്തിന്റെ ഒന്നാം ഇന്നിങ്‌സ് സ്‌കോറായ 306 റണ്‍സ് പിന്തുടര്‍ന്ന ജമ്മുവിന്റെ ആദ്യ ഇന്നിങ്‌സിലെ പോരാട്ടം 121 റണ്‍സില്‍ അവസാനിപ്പിച്ച് അവര്‍ ഫോളോ ഓണ്‍ വഴങ്ങി. കേരളത്തിന് 185 റണ്‍സ് ലീഡ് സ്വന്തമാക്കാനായി.
നാലു വിക്കറ്റെടുത്ത കെ മോനിഷിന്റെയും മൂന്നു വിക്കറ്റെടുത്ത ഇഖ്ബാല്‍ അബ്ദുല്ലയുടെയും മികച്ച പ്രകടത്തിനു മുന്നില്‍ ജമ്മു തകരുകയായിരുന്നു. അഞ്ചു വിക്കറ്റിനു 106 റണ്‍സ് എന്ന നിലയില്‍ നാലാം ദിനം ബാറ്റിങ് ആരംഭിച്ച ജമ്മുവിനു 15 റണ്‍സ് കൂടി ചേര്‍ക്കുന്നതിനിടെ മുഴുവന്‍ വിക്കറ്റുകളും നഷ്ടമായി. 40 റണ്‍സ് നേടിയ ആദില്‍ റിഷിയാണ് ടോപ് സ്‌കോറര്‍.ഫോളോ ഓണ്‍ ചെയ്തു വീണ്ടും ബാറ്റിങിനിനിറങ്ങിയ ജമ്മു 31.3 ഓവറില്‍ നാലു വിക്കറ്റ് നഷ്ടത്തില്‍ 91 എന്ന നിലയില്‍ പതറിയിരുന്നു. ഈ ഘട്ടത്തില്‍ മത്സരം സമനിലയില്‍ പിരിയാന്‍ തീരുമാനിക്കുകയായിരുന്നു. ആദ്യ ഇന്നിങ്‌സിലെ ലീഡിന്റെ പിന്‍ബലത്തില്‍ കേരളത്തിനു മൂന്നു പോയിന്റ് ലഭിച്ചു.