ചെറുതുരുത്തി: പാഞ്ഞാള്‍ പാറക്കല്‍ തോട്ടിലെ വെള്ളം ഉപയോഗിക്കരുതെന്ന് ആരോഗ്യ വകുപ്പ് മുന്നറിയിപ്പ് നല്‍കി.
 വരള്‍ച്ചയില്‍ നാട് ജലക്ഷാമത്തിന്റെ പിടിയിലമരുമ്പോഴാണ് ആരോഗ്യവകുപ്പിന്റെ മുന്നറിയിപ്പ്. പാഞ്ഞാള്‍ പഞ്ചായത്തിലെ കാട്ടില്‍കാവ് പാറക്കല്‍തൊടി നിവാസികളാണ് ഇതുമൂലം ദുരിതത്തിലാകുന്നത്. പാറക്കല്‍ തോട്ടിലെ വെള്ളം കോളനിക്കു സമീപം ചിറകെട്ടി നിര്‍ത്തിയിരിക്കുകയാണ്. ഈ വെള്ളമാണ് കോളനിയിലെ 17  കുടുംബങ്ങള്‍ കുളിക്കാനും അലക്കാനും ഉപയോഗിച്ചിരുന്നത്.
എന്നാല്‍, കുറച്ചു ദിവസമായി ഈ ജലാശയത്തില്‍ നിന്നു രൂക്ഷമായ ദുര്‍ഗന്ധം വമിക്കുകയാണ്. മീനുകളും തവളകളും ജലാശയത്തില്‍ ചത്തുകിടക്കുന്നുണ്ട്. ഇതേതുടര്‍ന്നാണ് ആരോഗ്യ വകുപ്പ് മുന്നറിയിപ്പ് നല്‍കിയത്.
കോളനിയിലെ ഒരാള്‍ക്കു മഞ്ഞപ്പിത്തം റിപ്പോര്‍ട്ട് ചെയ്തിട്ടുണ്ട്. ആരോഗ്യ വകുപ്പ്  അധികൃതര്‍ സ്ഥലത്തെത്തി ജലം പരിശോധിച്ച് വെള്ളം ഉപയോഗിക്കരുതെന്നു മുന്നറിയിപ്പ് നല്‍കുകയായിരുന്നു.