മണ്ണഞ്ചേരി :വധശ്രമകേസിലെ പ്രതിയെ പൊലീസ് പിടികൂടി.എട്ടുമാസമായി ഒളിവില്‍കഴിഞ്ഞ പ്രതി പൊലീസിന്റെ വലയിലാകുമ്പോള്‍ കുരുമുളകുപൊടി സ്‌പ്രെയും കൈയ്യിലുണ്ടായിരുന്നു.
മാരാരിക്കുളം തെക്ക് പഞ്ചായത്തില്‍ 19 -ാംവാര്‍ഡില്‍ പാനേഴത്തുവീട്ടില്‍ പ്രവീണ്‍(മൈക്കിള്‍-22) നെയാണ് മണ്ണഞ്ചേരി പൊലീസ് പിടികൂടിയത്.തിങ്കളാഴ്ച രാത്രി ചെട്ടികാട് ആശുപത്രിയ്ക്ക് സമീപത്ത് നിന്നാണ് ഇയാളെ പിടികൂടിയത്.
പൊലീസിനെകണ്ട പ്രവീണ്‍ കടലുമായി ബന്ധമുള്ള പൊഴിചാലില്‍ ചാടി രക്ഷപെടാന്‍ ശ്രമിക്കുകയായിരുന്നു.ഒപ്പം പൊഴിയിലേക്ക് പൊലീസും ചാടിയാണ് പ്രതിയെ പിടിച്ചത്. മരാരിക്കുളം തെക്ക് പഞ്ചായത്തില്‍ 22 -ാം വാര്‍ഡില്‍ വാഴക്കൂട്ടംപൊഴി സ്വദേശി സോളമനെ വധിക്കാന്‍ ശ്രമിച്ചതാണ് കേസ്.എട്ടുമാസം മുന്‍പ് നാലംഗസംഘം സോളമന്റെ വീട്ടില്‍ അധിക്രമിച്ചുകയറിയായിരുന്നു അക്രമണം.
കഴിഞ്ഞയാഴ്ച പ്രധാനപ്രതി ജെയ്‌സണിനെ പൊലീസ് പിടികൂടിയിരുന്നു. ഇയാളില്‍നിന്നുള്ള വിവരമാണ് പ്രവീണിനെ വലയിലാക്കിയത്.
മറ്റൊരുപ്രതിയെ നഗരത്തില്‍വച്ച് പൊലീസ് വളഞ്ഞെങ്കിലും തന്ത്രപരമായി ഇയാള്‍ രക്ഷപെട്ടിരുന്നു.കേസില്‍ ഇനി രണ്ടുപരെക്കൂടി അറസ്റ്റുചെയ്യാനുണ്ട്. മണ്ണഞ്ചേരി എസ്.ഐ ജോര്‍ജ്ജുകുട്ടിയുടെ നേതൃത്വത്തില്‍ അംബുജാക്ഷന്‍,സീനിയര്‍ സിവില്‍പൊലീസ് ഓഫീസര്‍ ബിജു,അഭിലാഷ്,അബ്ദുള്‍സത്താര്‍,പി.സി.ബിജു എന്നിവരാണ് പ്രതിയെ പിടികൂടിയത്. പ്രതിയെ പിടികൂടുന്നതിനിടയില്‍ സിവില്‍ പൊലീസ് ഓഫീസറായ അബ്ദുള്‍സത്താറിന് പരുക്കേറ്റിരുന്നു.