പാലക്കാട് : അഞ്ചാം ക്ലാസ്സ് വിദ്യാര്‍ഥിയെ ക്രൂരമായി മര്‍ദ്ദിച്ച് പല്ലിളക്കിയ സെന്റ് സെബാസ്റ്റ്യന്‍സ് എയിഡഡ് യു .പി സ്‌കൂളിലെ പ്രധാനാധ്യാപിക സിസ്റ്റര്‍ അന്ന മേരിയെ അറസ്റ്റ് ചെയ്യാത്തതില്‍ പ്രതിഷേധിച്ച് സൗത്ത് പൊലിസ് സ്റ്റേഷനിലേക്ക്  ബാലാവകാശ സംരക്ഷണ വേദി ജില്ലാ കമ്മിറ്റി ഇന്നു രാവിലെ 10 മണിക്ക്  നടത്താന്‍ തീരുമാനിച്ച പൊലിസ് സ്റ്റേഷന്‍ മാര്‍ച്ച് മാറ്റി വച്ചു. പ്രതിയെ അറസ്റ്റ് ചെയ്തുവെന്ന പൊലിസ് അറിയിപ്പിനെ തുടര്‍ന്നാണ് സ്റ്റേഷന്‍ മാര്‍ച്ച് മാറ്റി വച്ചതെന്ന് ബാലാവകാസംരക്ഷണ വേദി ജനറല്‍ കണ്‍വീനര്‍ അറിയിച്ചു. ജില്ലാ കലക്ടര്‍ക്ക് പരാതി നല്‍കി 16 ദിവസമായിട്ടും അടികൊണ്ട് ഇളകിയ പല്ല് നീക്കം ചെയ്തിട്ടും , ചൈല്‍ഡ് ലൈനിന്റെയും , ചൈല്‍ഡ് വെല്‍ഫെയര്‍ കമ്മിറ്റിയുടെയും, ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിന്റെയും അന്വേഷണ റിപ്പോര്‍ട്ടുകള്‍ ലഭിച്ചിട്ടും കുറ്റവാളിക്കെതിരെ നടപടിയെടുക്കാതിരിക്കുന്ന ജില്ലാ മജിസ്‌ട്രേറ്റ് കൂടിയായ ജില്ലാ കലക്ടര്‍ കുറ്റകരമായ മൗനം പാലിക്കുകയാണെന്നും ബാലാവകാശ സംരക്ഷണ വേദി നേതാക്കള്‍ കുറ്റപ്പെടുത്തി. നാളെ ജില്ലാ കലക്ടറെ നേരില്‍ കണ്ട് നിവേദനം നല്‍കും.