കാസര്‍കോട്: വി.എച്ച്.എസ്.ഇ പരീക്ഷാഫലം പ്രഖ്യാപിച്ചപ്പോള്‍ ജില്ലയില്‍ 71.04 ശതമാനം വിജയം. വൊക്കേഷനല്‍ ഹയര്‍ സെക്കന്ററി പരീക്ഷയില്‍ ജില്ലയിലെ 39 സ്‌കൂളുകളില്‍ നിന്നായി 1350 പേര്‍ പരീക്ഷയെഴുതി. 959 പേര്‍ ഉന്നത വിദ്യാഭ്യാസത്തിന് അര്‍ഹത നേടി. പാര്‍ട്ട് ഒന്ന്, രണ്ട് വിഷയങ്ങളില്‍ 1158 പേര്‍ പാസായി. വിജയശതമാനം 85.78 ശതമാനം. രണ്ട് വിഭാഗത്തിലും കഴിഞ്ഞ വര്‍ഷത്തെക്കാള്‍ കുറവാണ് വിജയശതമാനം. പാര്‍ട്ട് ഒന്ന്, രണ്ട്, മൂന്ന് വിഷയങ്ങളില്‍ ജയിച്ച ഗവ. വി.എച്ച്.എസ്.എസ് മുള്ളേരിയ ജില്ലക്ക് അഭിമാനാര്‍ഹമായ നേട്ടം സമ്മാനിച്ചു. 64 പേരെ പരീക്ഷക്കിരുത്തി 61 പേരെ ജയിപ്പിച്ച കെ.എം.വി.എച്ച്.എസ്.എസ് കൊടക്കാട്, 54 പേരെ പരീക്ഷക്കിരുത്തി മുഴുവന്‍ വിഷയങ്ങളിലും 51 പേരെ ജയിപ്പിച്ച കാറഡുക്ക സ്‌കൂളും ജില്ലയുടെ വിജയ ശതമാനം ഒരുക്കുന്നതില്‍ നിര്‍ണായക പങ്ക് വഹിച്ചു. സയന്‍സ് വിഷയങ്ങളില്‍ കാറഡുക്ക, മുള്ളേരിയ, ഇരിയണ്ണി, കുഞ്ചത്തൂര്‍, കാഞ്ഞങ്ങാട്‌സൗത്ത് സ്‌കൂളുകള്‍ നൂറു ശതമാനം വിജയം നേടി. എയ്ഡഡ് മേഖലയില്‍ വി.കെ.പി.കെ.എച്ച്, എം.എം.ആര്‍.വി.എച്ച്.എസ്.എസ് പടന്ന, കെ.എം.വി.എച്ച്.എസ്.എസ്് കൊടക്കാട് എന്നീ സ്‌കൂളുകളും നൂറു ശതമാനം വിജയം നേടി. മുഴുവന്‍ വിഷയങ്ങളിലും മുഴുവന്‍ വിഷയങ്ങളിലും എ പ്ലസ് നേടിയ തൃക്കരിപ്പൂര്‍ വി.കെ.പി.കെ.എച്ച് എം.എം.ആര്‍.വി.എച്ച്.എസ്.എസ് പടന്നയിലെ വരുണ്‍ രാജും അശ്വതിയും ഗവ.വി.എച്ച്.എസ്.എസ് മുള്ളേരിയയിലെ കെ.സംഗീതയും ജില്ലയുടെ അഭിമാനമായി. വൊക്കേഷനല്‍ ഹയര്‍ സെക്കന്‍ഡറി വിഭാഗം പരീക്ഷയില്‍ മുള്ളേരിയ സ്‌കൂളില്‍ പരീക്ഷ എഴുതിയ എല്ലാ കുട്ടികളും വിജയിച്ചു. തുടര്‍ച്ചയായി ഇത് നാലാം വര്‍ഷമാണ് സ്‌കൂളിന് 100 ശതമാനം ലഭിക്കുന്നത്. കോമേഴ്‌സ് വിഷയത്തില്‍ മാര്‍ക്കറ്റിങ് ആന്‍ഡ് സെയില്‍സ്മാന്‍ഷിപ്പ്, എക്കൗണ്ടന്‍സി ആന്‍ഡ് ഓഡിറ്റിങ് എന്നീ രണ്ട് വൊക്കേഷനല്‍ വിഷയങ്ങളിലായി 25 ആണ്‍കുട്ടികളും 28 പെണ്‍കുട്ടികളുമായി 53 പേരാണ് പരീക്ഷ എഴുതിയത്. വി.എച്ച്.എസ്.സി ഫലത്തില്‍ നൂറ് ശതമാനം കിട്ടിയ കാസര്‍കോട് ജില്ലയിലെ ഏക സര്‍ക്കാര്‍ വിദ്യാലയമാണ് മുള്ളേരിയ വൊക്കേഷനല്‍ ഹയര്‍ സെക്കന്‍ഡറി സ്‌കൂള്‍. പിന്നോക്ക വിഭാഗത്തിലെ കുട്ടികള്‍ ഏറെയുള്ള സ്‌കൂളാണിത്.