പാലക്കാട്: സംസ്ഥാന ചലച്ചിത്ര അവാര്‍ഡ് വിതരണവും 2015ലെ ജെ സി ഡാനിയല്‍ പുരസ്‌കാര സമര്‍പ്പണവും ഈമാസം 15ന് വൈകീട്ട് ആറിന് പാലക്കാട് ഇന്ദിരാഗാന്ധി സ്റ്റേഡിയത്തില്‍ നടക്കും. 2015ലെ സംസ്ഥാന ചലച്ചിത്ര അവാര്‍ഡ് മലയാള ചലച്ചിത്ര ലോകത്തിന് നല്‍കിയ സമഗ്ര സംഭാവനക്ക് കെ ജി ജോര്‍ജിന് സമ്മാനിക്കുമെന്ന് സാംസ്‌കാരിക വകുപ്പ് മന്ത്രി എ കെ ബാലന്‍ പത്രസമ്മേളനത്തില്‍ പറഞ്ഞു.
മുഖ്യമന്ത്രി പിണറായി വിജയന്‍ ഉദ്ഘാടനവും അവാര്‍ഡ് വിതരണവും നിര്‍വഹിക്കും. നിയമസഭാ സ്പീക്കര്‍ പി ശ്രീരാമകൃഷ്ണന്‍, പ്രതിപക്ഷ നേതാവ് രമേശ് ചെന്നിത്തല എന്നിവര്‍ മുഖ്യാതിഥികളായിരിക്കും. എം ബി രാജേഷ് എം പി, എം എല്‍ എ മാരായ ഷാഫി പറമ്പില്‍, കെ ബി ഗണേഷ്‌കുമാര്‍, എം മുകേഷ് എന്നിവര്‍ പങ്കെടുക്കും.