ഫറോക്ക്: വഴിയില്‍ നിന്നും കളഞ്ഞുകിട്ടിയ പഴ്‌സ് ഉടമസ്ഥനു തിരിച്ചുനല്‍കി ഓട്ടോഡ്രൈവര്‍ മാതൃകയായി. പെരുമുഖം കല്ലംപാറയിലെ ഓട്ടോഡ്രൈവര്‍ കെ.ടി മുഹമ്മദാണ് പണവും രേഖകളും അടങ്ങിയ പഴ്‌സ് ഉടമസ്ഥനെ വിളിച്ചു തിരികെ നല്‍കിയത്.
കടലുണ്ടിയില്‍ നിന്നും കല്ലംപാറയിലേക്ക് തിരികെ വരുന്ന വഴിക്ക് മണ്ണൂര്‍ പ്രബോധിനിയില്‍ നിന്നുമാണ് മുഹമ്മദിനു പഴ്‌സ് ലഭിച്ചത്. 37,000രൂപ, എ.ടി.എം കാര്‍ഡ്, ആധാര്‍കാര്‍ഡ് എന്നിവ പഴ്‌സില്‍ നിന്നും ലഭിച്ചു.
ഇതു പ്രകാരമാണ് ഉടമസ്ഥനായ മണ്ണൂര്‍ വടക്കുമ്പാട് സ്വദേശി ഫാഇസിനെ കല്ലംപാറയിലേക്ക് വിളിച്ചു വരുത്തി പഴ്‌സ് തിരികെ നല്‍കിയത്. ബൈക്ക് യാത്രക്കിടെയാണ് ഇദ്ദേഹത്തില്‍ നിന്നും പഴ്‌സ് നഷ്ടമായത്. കല്ലംപാറ ഓട്ടോസെക്ഷന്‍ എസ്.ടി.യു യൂനിറ്റ് ജോയന്റ് സെക്രട്ടറിയാണ് മുഹമ്മദ്. സഹപ്രവര്‍ത്തകരായ കാസിഖാന്‍, അബ്ദുല്‍ ബാരി കെ.ടി, അബൂബക്കര്‍ സിദ്ദീഖ് എന്നിവരുടെ സാന്നിധ്യത്തിലാണ് പഴ്‌സ് തിരികെ നല്‍കിയത്.