കൊണ്ടോട്ടി: പുളിക്കല്‍ എ.എം.എം.എച്ച്.എസ്.എസ് ഗണിത ലാബ് നിയമസഭ സ്പീക്കര്‍ പി.ശ്രീരാമകൃഷ്ണനും ലൈബ്രറി ഇ.അഹമ്മദ് എം.പിയും നാളെ ഉദ്ഘാടനം ചെയ്യുമെന്ന് സ്‌കൂള്‍ അധികൃതര്‍ വാര്‍ത്താ സമ്മേളനത്തില്‍ പറഞ്ഞു. ടി.വി ഇബ്രാഹീം എം.എല്‍.എ അധ്യക്ഷനാകും. ഒന്‍പത് ലക്ഷം മുടക്കിയാണ് സ്‌കൂളില്‍ പുതിയ ഗണിത ലാബ് ഒരുക്കിയിട്ടുളളത്.
ഇതില്‍ മൂന്ന് ലക്ഷവും അധ്യാപകരും ശേഷിക്കുന്നത് പൂര്‍വവിദ്യാര്‍ഥികളും മാനേജ്‌മെന്റെും പി.ടി.എയും നല്‍കി.
പുതിയ ലൈബ്രറിയിലേക്ക് പുസ്തകങ്ങള്‍ എത്തിക്കാനായി പാട്ടുവണ്ടിയും ഇന്നലെ ഒരുക്കി. ഗണിത ലാബ് ഡയറക്ടര്‍ വി.ആര്‍ അജയകുമാറിനെ ചടങ്ങില്‍ ആദരിക്കും. പഞ്ചായത്ത് പ്രസിഡന്റുമാരായ സുനീറ വഹാബ്, ഷിജിനി ഉണ്ണി, ബ്ലോക്ക് വൈസ് പ്രസിഡന്റ് എ.അബ്ദുല്‍ കരീം, ജില്ലാപഞ്ചായത്ത് അംഗങ്ങളായ സെറീന ഹസീബ്, പി.ആര്‍ രോഹില്‍നാഥ് തുടങ്ങിയവര്‍ പങ്കെടുക്കും. വാര്‍ത്ത സമ്മേളനത്തില്‍ പി.പി മൂസ, എന്‍.കെ യസീദ് കോയ തങ്ങള്‍, കെ.ശോഭ, പി.ഡി ഹനീഫ, പി.സി മുഹമ്മദ് മാസ്റ്റര്‍ തുടങ്ങിയവര്‍ പങ്കെടുത്തു.