കോഴിക്കോട്: ഭരണം നടത്തുന്നവരുടെ സ്വേച്ഛാധിപത്യം ജനാധിപത്യമായി പരിഗണിക്കുന്ന രാഷ്ട്രീയാന്തരീക്ഷമാണ് ഇന്ത്യയിലുള്ളതെന്ന് നടന്‍ ശ്രീനിവാസന്‍. കാലിക്കറ്റ് പ്രസ്‌ക്ലബിന്റെ ആഭിമുഖ്യത്തില്‍ ലളിതകലാ അക്കാദമി ആര്‍ട്ട് ഗാലറിയില്‍ സംഘടിപ്പിച്ച പ്രസ് ഫോട്ടോഗ്രാഫര്‍മാരുടെ വാര്‍ത്താചിത്ര പ്രദര്‍ശനത്തിന്റെ ഉദ്ഘാടന ചടങ്ങില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. സിംഗപ്പൂരില്‍ ഭരണകക്ഷിക്ക് 70ല്‍ 70 സീറ്റും കിട്ടുന്ന ചരിത്രമാണുള്ളത്. ഒരിക്കല്‍ മാത്രം മൂന്നോ നാലോ സീറ്റുകള്‍ പ്രതിപക്ഷ പാര്‍ട്ടിക്ക് കിട്ടി. ഇത് ഭരണകക്ഷിയുടെ ഉറക്കം കെടുത്തി. അവര്‍  തോല്‍വിയുടെ കാരണം കണ്ടെത്തി. പരിഹാരം ഉണ്ടാക്കുകയും ചെയ്തു. വീണ്ടും നൂറുശതമാനം സീറ്റും നേടി. വീഴ്ച സംഭവിച്ചാല്‍ തിരുത്തണം. അത്തരം നടപടികള്‍ നമ്മുടെ നാട്ടില്‍ ഉണ്ടാവുന്നില്ല. ശ്രീനിവാസന്‍ പറഞ്ഞു.